Այս պահին էսկալացիայի վտանգ չկա. ձեր խոսափողների մոտ խոստովանություն չեմ անում. ԳՇ պետ
Այս պահի դրությամբ ՀՀ–ում պատերազմի կամ ռազմական էսկալացիայի վտանգ չկա։ ՀՀ ԶՈւ գլխավոր շտաբի պետ Էդվարդ Ասրյանն այս հայտարարությունն արեց Ազգային ժողովում` պատասխանելով լրագրողների հարցերին։
«Իրադրությունն այս պահին սահմաններում համարվում է հարաբերական կայուն»,- ասաց նա։
ԳՇ պետը հավելեց, որ համաձայն է ՀՀ վարչապետ Նիկոլ Փաշինյանի այն դիտարկմանը, որ օկուպացված տարածքները պետք է հետ բերել ոչ ռազմական ճանապարհով։
«Սահմանազատման գործընթացով նախատեսվում է ՀՀ ինքնիշխան տարածքի վերականգնում` համապատասխան սահմաններով»,– ասաց նա։
Ասրյանը վստահություն հայտնեց, որ դա հնարավոր է անել խաղաղ գործընթացով:
Հիշեցնենք` ՀՀ արտգործնախարար Արարատ Միրզոյանը հոկտեմբերի 23-ին հայտարարել էր` քանի դեռ չկա ստորագրված, վավերացված խաղաղության պայմանագիր Ադրբեջանի հետ, ավարտված սահմանազատման գործընթաց, կայունություն, երկարատև խաղաղություն, ՀՀ–ն մտավախություններ ունի Ադրբեջանի հավանական գործողությունների վերաբերյալ։
