Նեթանյահուն ԱՄՆ կոնգրեսի առջև ելույթում խոստացել է «լիակատար հաղթանակ» տանել Գազայում և քննադատել է ցուցարարներին
Իսրայելի վարչապետ Բենիամին Նեթանյահուն հուլիսի 24-ին ԱՄՆ կոնգրեսում ունեցած ելույթում խոստացել է հասնել «լիակատար հաղթանակի» պաղեստինյան ՀԱՄԱՍ արմատական շարժման դեմ։ Նա նաև քննադատել է այն ամերիկացիներին, որոնք դեմ են Գազայում պատերազմին՝ նրանց անվանելով «հիմար»։
Այս մասին հաղորդում է The Associated Press գործակալությունը։
Կոնգրեսի երկու պալատների համատեղ նիստում ելույթ ունենալիս Նեթանյահուն ընդգծել է ԱՄՆ-ի և Իսրայելի միջև սերտ հարաբերությունները՝ նշելով, որ «Ամերիկան և Իսրայելը պետք է կանգնեն միասին»։
Իր ելույթում Նեթանյահուն չի բացառել ՀԱՄԱՍ-ի հետ գործարքի կնքումը, սակայն նաև չի հայտնել, որ առաջիկայում նման գործարք հնարավոր է։ «Իսրայելը կկռվի այնքան, մինչև մենք ոչնչացնենք ՀԱՄԱՍ-ի ռազմական կարողությունները և Գազայում նրա իշխանությունը և մեր բոլոր պատանդներին տուն վերադարձնենք։ Դա է լիակատար հաղթանակը։ Եվ մենք դրանից պակաս ոչնչի չենք համաձայնի», – ասել է Նեթանյահուն։ Տասնյակ դեմոկրատ օրենսդիրներ բոյկոտել են Նեթանյահուի ելույթը, իսկ Կոնգրեսի առջև հավաքված հազարավոր ցուցարարները քննադատել են պատերազմը և դրա առաջացրած հումանիտար ճգնաժամը։
Ցուցարարները ներկ են լցրել մարմարե արձանների վրա, ամերիկյան դրոշները փոխարինել են պաղեստինյան դրոշներով։ Իրավապահների և հավաքվածների միջև բախումներ են տեղի ունեցել, ցուցարարների դեմ կիրառվել է արցունքաբեր գազ։ Իր խոսքում Նեթանյահուն ամերիկացի ցուցարարներին մեղադրել է այն բանում, որ նրանք աջակցում են զինյալներին, որոնց հարձակման հետևանքով 2023 թ. հոկտեմբերի 7-ին Իսրայելում 1200 մարդ է զոհվել, շուրջ 250 մարդ՝ գերեվարվել։ Իսրայելի պատասխան ռազմական գործողությունների հետևանքով Գազայի հատվածում զոհերի թիվը գերազանցել է 39 000-ը։
«Այս ցուցարարները, որոնք կանգնած են նրանց կողքին, պետք է ամաչեն իրենցից», – ասել է Իսրայելի վարչապետը։ Նա նաև ցուցարարներին անվանել է Իսրայելի հակառակորդների համար «օգտակար հիմարներ»։Հուլիսի 25-ին նախատեսված է Նեթանյահուի հանդիպումը ԱՄՆ նախագահ Ջո Բայդենի և փոխնախագահ Քամալա Հարիսի հետ, իսկ հուլիսի 26-ին Իսրայելի վարչապետը Ֆլորիդայում կհանդիպի ԱՄՆ նախկին նախագահ Դոնալդ Թրամփի հետ։
