Թբիլիսին և Երևանն աջակցում են միմյանց տարածքային ամբողջականությանն ու ինքնիշխանությանը․ Վրաստանի ԱԳ նախարար
Վրաստանի արտաքին գործերի նախարար Իլյա Դարչիաշվիլին հայտարարել է, որ Թբիլիսին և Երևանը մեծապես աջակցում և հարգում են միմյանց տարածքային ամբողջականությանն ու ինքնիշխանությանը։
Վրացի պաշտոնյան այս մասին հայտարարել է Հայաստանի արտաքին գործերի նախարար Արարատ Միրզոյանի հետ համատեղ մամուլի ասուլիսի ընթացքում։
Վրացի նախարարը նշել է, որ Երևանն ու Թբիլիսին ունեն առանձնահատուկ բարեկամական և բարիդրացիական հարաբերություններ, որոնք երկար դարերի պատմություն ունեն։ Նա վստահություն է հայտնել, որ Արարատ Միրզոյանի այցը Վրաստան նոր լիցք կհաղորդի երկկողմ հարաբերություններին։
«Հարկ է նշել, որ ռազմավարական գործընկերության հռչակագրի ստորագրմամբ՝ մեր երկկողմ համագործակցությունը որակապես նոր մակարդակի է անցել։ Այս նոր փուլը շրջադարձային էր մեր բազմակողմ համագործակցության մեջ»,- ընդգծել է Իլյա Դարչիաշվիլին։
Վերջինս նաև շնորհակալություն է հայտնել հայ գործընկերոջը ՄԱԿ-ի գլխավոր ասամբլեայի ընդունած բանաձևին կողմ քվեարկելու համար, որը հաստատում է բոլոր ներքին տեղահանվածների, փախստականների՝ Աբխազիա և Հարավային Օսեթիա վերադառնալու իրավունքը։
«Վրաստանը և Հայաստանը մեծապես աջակցում և հարգում են միմյանց տարածքային ամբողջականությանը և ինքնիշխանությանը»,- իր խոսքում ընդգծել է Վրաստանի ԱԳ նախարարը՝ տեղեկացնելով, որ հայ գործընկերոջ հետ քննարկել է երկու երկրների միջև բազմաոլորտ համագործակցության հետ կապված հարցեր։
Նա հավելել է, որ Հայաստանը Վրաստանի առևտրային գործընկերների տասնյակում է, իսկ զբոսաշրջության առումով՝ եռյակում։
