Չինաստանը հայտարարել է, որ ցանկանում է առողջ հարաբերություններ զարգացնել ԱՄՆ-ի հետ
Չինաստանը ցանկանում է առողջ հարաբերություններ զարգացնել Միացյալ Նահանգների հետ՝ անկախ այն բանից, թե ով կհաղթի նոյեմբերին անցկացվելիք նախագահական ընտրություններում։ Այդ մասին ճեպազրույցում հայտարարել է ՉԺՀ արտգործնախարարության պաշտոնական ներկայացուցիչ Վան Վենբինը։
«Անկախ այն բանից, թե ով կընտրվի ԱՄՆ հաջորդ նախագահ, մենք հուսով ենք, որ ամերիկյան կողմը կշարժվի Չինաստանին ընդառաջ, ինչպես նաև կնպաստի չին-ամերիկյան հարաբերությունների կայուն, առողջ և հաստատուն զարգացմանը՝ հենվելով փոխադարձ հարգանքի, խաղաղ համակեցության և ընդհանուր շահերի սկզբունքների վրա», – Վան Վենբինի խոսքերն է մեջբերում «ՌԻԱ Նովոստի»-ն։
Պաշտոնյան հավելել է, որ Չինաստանը կշարունակի պաշտպանել իր ինքնիշխանությունը և զարգացման շահերը։
«Չինաստանը հավատարիմ է այլ երկրների ներքին գործերին չմիջամտելու սկզբունքին և չի միջամտում ԱՄՆ ընտրություններին», – ընդգծել է դիվանագետը։
