Իրանի արտգործնախարարը ժամանել է Պակիստան՝ երկու երկրների միջև հարաբերությունների սրման ֆոնին
Իրանի արտգործնախարար Հոսեյն Ամիր Աբդոլլահիանը հունվարի 29-ի գիշերը ժամանել է Պակիստան՝ երկու երկրների միջև հարաբերությունների սրման ֆոնին։
Աբդոլլահիանի այցը տեղի է ունենում Պակիստանի արտգործնախարար Ջալիլ Աբբաս Ջիլանիի հրավերով։
Իրանի ԱԳՆ ղեկավարը կհանդիպի Պակիստանի կառավարության պաշտոնյաների, այդ թվում՝ վարչապետի պաշտոնակատարի հետ՝ քննարկելու անվտանգությանը, տնտեսությանը և առևտրին վերաբերող հարցեր։
Հունվարի 22-ին կողմերը համատեղ հայտարարություն էին տարածել իրենց դեսպանների աշխատանքը վերսկսելու մասին։
Հունվարի 16-ին Իրանը հարվածներ էր հասցրել Պակիստանի տարածքում՝ նշելով, որ թիրախավորել է «Ջաիշ ալ Ադլ» ահաբեկչական խմբավորման երկու հենակետ։ Պակիստանը հայտնել էր, որ այդ հարվածների հետևանքով 2 երեխա է զոհվել, և Իրանին նախազգուշացրել էր հնարավոր հետևանքների մասին։
Իսկ հունվարի 18-ին Պակիստանն էր հարվածներ հասցրել Իրանի տարածքին՝ հայտարարելով, որ թիրախավորում է անջատողական զինյալների։ Պակիստանի հարվածներից Իրանի Սիստան և Բելուջիստանի նահանգում 9 մարդ էր զոհվել։
Պակիստանը հետ էր կանչել Թեհրանում իր դեսպանին, իսկ այդ պահին հայրենիքում գտնվող Իրանի դեսպանին ասել էր չվերադառնալ Իսլամաբադ։
