Bloomberg. Կատարը հրադադարի նոր համաձայնագիր է ներկայացրել Իսրայելին և ՀԱՄԱՍ-ին
Կատարը հրադադարի առաջարկ է ներկայացրել Իսրայելին և պաղեստինյան արմատական ՀԱՄԱՍ շարժմանը։ Այս մասին չորեքշաբթի հայտնել է Bloomberg-ը՝ վկայակոչելով բանակցություններին ծանոթ մարդկանց։
Նրանց խոսքով՝ ծրագիրը նախատեսում է Գազայի հատվածում պահվող բոլոր պատանդների ազատ արձակում, իսկ Իսրայելն իր հերթին պետք է ազատ արձակի որոշ պաղեստինցի բանտարկյալների։ Համաձայնագրում խոսվում է նաև անկլավին մարդասիրական օգնության մասին. դրա ծավալները պետք է ավելանան։
Ինչպես նշում է գործակալությունը, զինադադարի հասնելուն խոչընդոտում են Գազայում գործողությունը շարունակելու մասին Իսրայելի հայտարարությունները, քանի դեռ ՀԱՄԱՍ-ն ամբողջությամբ չի ոչնչացվել։
Ավելի վաղ էմիրության արտաքին գործերի նախարարության պաշտոնական ներկայացուցիչ Մաջիդ բեն Մուհամմեդ ալ-Անսարին հայտարարել էր, որ Կատարի իշխանությունները շարունակում են միջնորդական ջանքեր գործադրել Գազայի հատվածում ճգնաժամը կարգավորելու համար։
