Նեթանյահուն մերժել է իսրայելի գերիներին վերադարձնելու՝ ՀԱՄԱՍ-ի առաջարկած պայմանները
Իսրայելի վարչապետ Բենյամին Նեթանյահուն մերժել է պաղեստինյան ՀԱՄԱՍ արմատական շարժման առաջադրած պայմանները, որոնցով առաջարկվում էր վերջ դնել պատերազմին և ազատել իսրայելցի պատանդներին։
Reuters գործակալությունը հաղորդում է, որ ըստ այդ պայմանների՝ Իսրայելը պետք է լիովին դուրս գար Գազայի հատվածից և անկլավի վերահսկողությունը թողներ ՀԱՄԱՍ-ին։
«Մեր պատանդների ազատ արձակման դիմաց ՀԱՄԱՍ-ը պահանջում է պատերազմի ավարտ, մեր ուժերի դուրսբերում Գազայից, բոլոր մարդասպանների և բռնաբարողների ազատ արձակում», – ասել է Նեթանյահուն՝ հավելելով, որ մերժում է այդ պայմանները։
ՀԱՄԱՍ-ի պաշտոնյաներից մեկը Reuters գործակալությանը հայտնել է, որ Գազայում ռազմական գործողությունները դադարեցնելուց Նեթանյահուի հրաժարվելը «նշանակում է, որ գերիների վերադարձի ոչ մի շանս չկա»։
Հոկտեմբերի 7-ին ՀԱՄԱՍ-ի զինյալների ներխուժման հետևանքով Իսրայելում 1200 մարդ էր զոհվել, 240 մարդ՝ գերեվարվել։ ԱՄՆ-ի, Կատարի-ի և Եգիպտոսի միջնորդությամբ ձեռք բերված համաձայնության ընթացքում նոյեմբերի վերջին ավելի քան 100 պատանդ վերադարձվել էր, որի դիմաց Իսրայելն ազատ էր արձակել իր մոտ բանտարկված 240 պաղեստինցիների։
Գազայի հատվածում Իսրայելի ռազմական գործողությունների ընթացքում զոհերի թիվն, ըստ պաղեստինյան իշխանությունների, հասել է 25 000-ի։
