Բայդենը Զելենսկիի հետ հանդիպման ժամանակ հայտարարել է Կիևին օգնության նոր փաթեթ տրամադրելու մասին
ԱՄՆ նախագահ Ջո Բայդենը Սպիտակ տանն ընդունել է Ուկրաինայի նախագահ Վլադիմիր Զելենսկիին և վերահաստատել, որ Միացյալ Նահանգները կշարունակի աջակցել Ուկրաինայի պաշտպանությանն այնքան, որքան անհրաժեշտ կլինի։ Այդ մասին հայտնել է Սպիտակ տան մամուլի ծառայությունը։
Բայդենն իր ուկրաինացի գործընկերոջը հայտնել է անվտանգության բնագավառում ԱՄՆ-ի առաջիկա օգնության, մասնավորապես՝ հրետանային միջոցների, զինամթերքի և հակատանկային զենքերի նոր մատակարարումների մասին։ Իսկ հաջորդ շաբաթ Ուկրաինային կմատակարարվեն ամերիկյան առաջին Abrams տանկերը։
Բացի այդ, ԱՄՆ-ն նախագահը նշել է, որ Վաշինգտոնը կենտրոնացած է Ուկրաինայի հակաօդային պաշտպանության կարողությունների ավելացման վրա՝ պաշտպանելու կարևոր ենթակառուցվածքները, հատկապես ձմռանն ընդառաջ:
Հաղորդագրության համաձայն՝ ՆԱՏՕ-ի իր 29 գործընկերների հետ միասին Վաշինգտոնը հանձնառու է երկարաժամկետ հեռանկարում ուժեղացնել Ուկրաինայի պաշտպանական ներուժը, որպեսզի այն զսպի իր տարածքային ամբողջականությանն ու ազատությանը հետագա սպառնալիքները:
Իր հերթին Զելենսկին շնորհակալություն է հայտնել ԱՄՆ-ի կողմից տրամադրվող օգնության համար։ Նա նաև նշել է, որ որոշակի քայլեր են համաձայնեցվել ուկրաինական հացահատիկի արտահանումներն ընդլայնելու ուղղությամբ։
