Լեռնային Ղարաբաղի հետ բելգիական ֆրանսախոս բարեկամության խումբը շնորհավորական ուղերձ է հղել Սամվել Շահրամանյանին
Արցախի հետ բելգիական ֆրանսախոս բարեկամության խմբի համակարգող Անդրե Դյու Բուսը խմբի անունից շնորհավորական ուղերձ է հղել Լեռնային Ղարաբաղի Հանրապետության նորընտիր նախագահին՝ Սամվել Շահրամանյանին։
Դյու Բյուսն իր շնորհավորական ուղերձում ընդգծել է, որ ներկա պայմաններում Սամվել Շահրամանյանի ընտրությունը առաջին հերթին հույս է Արցախի ժողովրդի համար, բայց նաեւ բոլոր նրանց համար, ովքեր առանձնահատուկ ուշադրություն են դարձնում պայմաններին, որոնք թույլ կտան վերացնել ներկայիս շրջափակումը, որն ամեն օր լրացուցիչ տառապանքներ է առաջացնում։ Արցախի հետ բարեկամության խմբի համակարգողը նշել է, որ նոր նախագահի ընտրությունը հերթական ապացույցն է, որ Արցախի Հանրապետությունում ժողովրդավարությունը մնում է հիմնարար արժեք։
«Խնդրում եմ, իմացեք, որ մենք հատկապես ուշադիր ենք զարգացող իրավիճակի հանդեպ, որն ազդում է մեզ վրա, քանի որ հնարավորություն, պատիվ ու հաճույք ենք ունեցել՝ բացահայտելու ձեր հոյակապ տարածաշրջանը և այնտեղ մեծահոգությամբ ու առատաձեռնությամբ հյուրընկալվել: Այս համատեքստում, առավել քան երբևէ, մեր լիակատար աջակցությունը Ձեզ հետ է», – ասված է Արցախի հետ ֆրանսախոս բելգիական բարեկամության խմբի անունից Սամվել Շահրամանյանին ուղղված գրությունում։
Արցախի հետ բելգիական ֆրանսախոս բարեկամության խումբը ստեղծվել է 2017 թվականին և համախմբում է շուրջ տասնհինգ ֆրանսախոս բելգիացի քաղաքական գործիչների տարբեր քաղաքական կուսակցություններից, ինչպես նաեւ ակադեմիկոսների եւ Բելգիայի քաղաքացիական հասարակության այլ գործիչների։
