Երևանի քաղաքապետարանը մեկնաբանել է երթուղային ավտոբուսի ուղղությամբ կրակոցի մասին լուրը
Երևանի Շինարարներ և Աբելյան փողոցների խաչմերուկում, ժամը 13։00-ի սահմաններում 18 համար երթուղային ավտոբուսի ապակին անհայտ հանգամանքներում վնասվել է․ տարածվող լուրերի համաձայն՝ ավտոբուսի ուղղությամբ կրակոց է եղել։
Դեպքի առնչությամբ «Արմենպրես»-ը զրուցել է Երևանի քաղաքապետի մամուլի քարտուղար Հայկ Կոստանյանի հետ, ով նշեց, որ դեռ պարզ չի թե ինչ հանգամանքներում է վնասվել մեքենայի ապակին։
«Մենք դիմել ենք ոստիկանություն, որպեսզի պարզվի դեպքի հանգամանքները։ Քննությունը իրականացնելուց հետո կարող ենք հստակ տեղեկություն տալ՝ կրակոց է եղե՞լ, քա՞ր է դիպչել, թե այլ հանգամանքներում է դեպքը տեղի ունեցել։ Կրակոցի վարկածը ոչ հերքում ենք, ոչ հաստատում»,- ասաց Կոստանյանը։
«Մեդիահաբ»-ի հետ զրույցում 18 երթուղային համարի ավտոբուսի վարորդը պատմել էր, որ ուժեղ ձայն է լսել, ավտոբուսը կանգնեցրել է, որից հետո նկատել է, որ ավտոբուսի ապակիներից մեկը ճաքել է։ Ուղևորներից մեկը ևս հաստատել է վարորդի պատմածը։
