Թրամփին նոր մեղադրանքներ են առաջադրվել, որոնք նրան սպառնում են մինչև 20 տարվա ազատազրկմամբ
ԱՄՆ նախկին նախագահ Դոնալդ Թրամփին մեղադրանք է առաջադրվել 2020 թ․-ի նախագահական ընտրությունների արդյունքները չեղյալ հայտարարելու փորձի առնչությամբ։ Թրամփը հերքել է մեղադրանքները, իսկ իր հանդեպ հարուցված գործն անվանել «զավեշտալի»։
Ինչպես տեղեկանում ենք BBC-ից, Սպիտակ տան նախկին ղեկավարին մեղադրանք է առաջադրվել 4 կետով՝ դավադրություն ԱՄՆ-ին խաբելու նպատակով, դավադրություն պաշտոնական ընթացակարգերը խոչընդոտելու նպատակով, վկայի վրա ազդեցության կիրառում, դավադրություն քաղաքացիների իրավունքների խախտումների նպատակով։
Մեղադրական կետերից երկուսի դեպքում օրենքը նախատեսում է մինչև 20 տարվա ազատազրկում։
Ըստ մեղադրական փաստաթղթի՝ 2021 թվականի հունվարի 6-ին Թրամփը և նրա աջակիցները «փորձել են բռնություն և քաոս կիրառել Կապիտոլիումի բլրի վրա՝ համոզելու օրենսդիրներին հետաձգել ընտրությունների արդյունքների պաշտոնական ճանաչումը՝ հիմնվելով ընտրակեղծիքների դեպքերի մասին կեղծ հայտարարությունների վրա»։
Սա Թրամփի դեմ առաջադրված քրեական մեղադրանքներից երրորդն է և ամենալուրջը։ Մյուս երկու գործերի շրջանակներում Թրամփին մեղադրում են գաղտնի փաստաթղթերի հետ վարվելու կանոնների խախտման և պոռնո աստղ Սթորմի Դենիելսին լռեցնելու նպատակով նրան վճարելու և դրա պատճառով գործարար հաշվետվությունները կեղծելու մեջ։
Թրամփը, որը դարձյալ իր թեկնածությունն է առաջադրել առաջիկա նախագահական ընտրություններին մասնակցելու համար, պետք է Վաշինգտոնում դատարան ներկայանա օգոստոսի 3-ին։
Թրամփի նախընտրական քարոզարշավի թիմը հայտարարություն է տարածել՝ նշելով, որ այդ մեղադրանքները համազոր են ընտրություններին միջամտության, անօրինական են և հիշեցնում են «1930-ականների նացիստական Գերմանիան, նախկին Խորհրդային Միությունը և այլ ավտորիտար, բռնապետական վարչակարգերը»։
