Մարս թռչելու համար ատոմային շարժիչով հրթիռը կկառուցի Lockheed Martin-ը. թռիչքը նախատեսված է 2027-ին
NASA-ն հայտարարել է, որ միջուկային էներգիայով ցուցադրական հրթիռի նախագծման, կառուցման և փորձարկման գլխավոր կապալառու է ընտրվել Lockheed Martin ընկերությունը։ Նախագծին մասնակցում են նաև մի շարք ընկերություններ, այդ թվում՝ BWX Technologies-ը, որը նախագծում է միջուկային ջերմային շարժիչ։ Lockheed Martin-ի առաջադրանքն է հավաքել ցուցադրական հրթիռ, որը տիեզերք պետք է արձակվի չորս տարի հետո։
Ակնկալվում է, որ ատոմային ջերմային շարժիչները երկուսից հինգ անգամ ավելի մեծ մղման ուժ կունենան, քան ժամանակակից քիմիական հրթիռային շարժիչները։ Դրանք նաև տասնյակ հազարավոր անգամ ավելի հզոր են, քան իոնային էներգիայով աշխատող էլեկտրական շարժիչները: Օրինակ՝ ատոմային շարժիչի վրա հրթիռի օգնությամբ NASA-ն ակնկալում է կիսով չափ կրճատել տիեզերագնացներին Մարս հասցնելու ժամանակահատվածը, ինչի շնորհիվ տիեզերագնացները կպահպանեն իրենց առողջությունը շատ ուժեղ ճառագայթմամբ տարածությունում թռչելիս:
Lockheed Martin-ը պատասխանատու է լինելու շարժիչը և այլ բաղադրիչները հրթիռում ինտեգրելու, հրթիռի նախագծման և պատրաստման և 2027-ին այն տիեզերք ուղարկելու համար: Միջուկային ջերմային շարժիչը նախագծում է BWX Technologies ընկերությունը։ Նախկինում այս նպատակների համար NASA-ն և DARPA-ն պայմանագրեր էին կնքել Blue Origin, Gryphon Technologies և General Atomics-ի հետ:
«DARPA-ի և առևտրային տիեզերական արդյունաբերության ընկերությունների հետ աշխատանքը թույլ կտա մեզ արագացնել մարդկանց Մարս ուղարկելու համար անհրաժեշտ տեխնոլոգիաների զարգացումը,- ասել է NASA-ի փոխտնօրեն Փամ Մելրոյը,- Այս ցուցադրությունը կարևոր քայլ կլինի մեր նպատակներին հասնելու համար անձնակազմին Լուսնից Մարս խորը տիեզերք տեղափոխելու համար»:
Բոլոր պայմանագրերն ու նախագծերն իրականացվում են 2020-ին DARPA-ի կողմից ներկայացված DRACO-ի (Demonstration Rocket for Agile Cislunar Operations) ծրագրի նպատակների համար։ ԱՄՆ զինվորականները մեծ ծրագրեր ունեն միջուկային հրթիռային շարժիչների հետ կապված։ Մասնավորապես, նման երկար աշխատող շարժիչներն անհրաժեշտ են ԱՄՆ զինվորականների կողմից Երկիր-Լուսին տարածությունում մշտական պարեկության համար։ Սպասվում է, որ մինչև 2030-ը և այս տարածքում տիեզերանավերի լարված երթևեկություն կլինի, և ԱՄՆ բանակը ցանկանում է լիակատար ներկայություն ունենալ այնտեղ գիտական և առևտրային առաքելությունների անվտանգությունն ապահովելու համար:
NASA-ն մինչև 300 մլն դոլար է հատկացնում DRACO ծրագրի շրջանակում նախագծերի իրականացման համար։ Այս գումարը ներառում է մինչև 250 միլիոն դոլարի միջուկային շարժիչի նախագծման և մշակման ծախսերը, ինչպես նաև գործակալության աշխատակիցների տեխնիկական հսկողությունն ու փորձաքննությունը։
