Քաղաքացիները դժգոհ են. 51 տոկոսը հավանություն չի տվել Նիկոլ Փաշինյանի գործունեությանը. հարցում
«GALLUP International Association»-ի Հայաստանում լիիրավ անդամ Էմ Փի ՋԻ ՍՊԸ-ն հերթական հարցումն է անցկացրել «Թուք ու մուր» խորհրդանշական խորագրով, ապրիլի 26-30-ն ընկած ժամանակահատվածում՝ 1100 հեռախոսային հարցումների միջոցով։
Քաղաքացիները դժգոհ են կառավարությունից, Ազգային ժողովից, Նիկոլ Փաշինյանից, Վահագն Խաչատուրյանից, Ալեն Սիմոնյանից
Այսպիսով, հարցված քաղաքացիների կեսից ավելին՝ 51 տոկոսը, հավանություն չի տվել՝ Նիկոլ Փաշինյանի, իսկ 54.3-ը՝ կառավարության գործունեությանը: Առավել բացասական գնահատականի է արժանացել Ազգային ժողովը. քաղաքացիների 67.4 տոկոսն է դժգոհել խորհրդարանի աշխատանքից: 55.6 տոկոսն էլ հավանություն չի տվել նախագահ Վահագն Խաչատուրյանի աշխատանքին:
55.3 տոկոսի կարծիքով էլ ԱԺ-ն չի արտացոլում երկրի իրական քաղաքական իրավիճակը:
Ի դեպ, ըստ հետազոտության, 58.5 տոկոսն անհրաժեշտ է համարել ԱԺ նախագահ Ալեն Սիմոնյանի հրաժարականը Կասկադի հայտնի միջադեպից հետո, երբ նա թքել էր իրեն «դավաճան» անվանած քաղաքացու դեմքին:
