Կարծրատիպ է, որը պետք է կոտրել՝ սպորտը սեռ չունի, այն ստեղծված է՝ ինչպես տղամարդկանց, այնպես էլ՝ կանանց համար, և բոլորը պետք է դա ընդունեն. Էմմա Պողոսյան
Երևանում 2023 թվականի ապրիլի 15-23-ն անցկացվող ծանրամարտի Եվրոպայի առաջնությունում առաջին անգամ մասնակցում էր 16-ամյա ծանրորդուհի Էմմա Պողոսյանը, ով երկամարտի 214 կգ արդյունքով 5-րդ տեղը զբաղեցրեց:
Նա միանգամից գրավեց հանրության ուշադրությունը, ու շատերը նրան համարեցին ծանրամարտի երկնակամարում փայլող նոր աստղ:
Ո՞վ է այս «ուժեղ» աղջիկը, ի՞նչ երազանքներ ունի, փորձեցինք պարզել հենց նրանից:
– Էմմա, ինչո՞ւ որոշեցիք զբաղվել ծանրամարտով։ Բարեկամների շրջանում ունեի՞ք սպորտով զբաղվող, որ օրինակ է ծառայել Ձեզ համար։
– Փոքր տարիքից սիրել եմ ծանրամարտը և շատ եմ ցանկացել զբաղվել այդ մարզաձևով: Բարեկամների շրջանում ես առաջին ծանրորդն եմ:
– Շատերն ասում են՝ ծանրամարտն աղջկան հարմար մարզաձև չէ։ Երբ սկսեցիք զբաղվել սպորտով, ինչպե՞ս արձագանքեցին հարազատները։
– Դա կարծրատիպ է, որը պետք է կոտրել: Սպորտը սեռ չունի, այն ստեղծված է՝ ինչպես տղամարդկանց, այնպես էլ՝ կանանց համար, և բոլորը պետք է դա ընդունեն:
– Կա՞ հայտնի կին ծանրորդ, ում ուզում եք նմանվել։
– Այո, ռումինացի ծանրորդուհին՝ Տոմա Լորեդանան: Ես նրանով հիանում եմ:
– Այդքան ծանր քաշ բարձրացնելու ընթացքում եղե՞լ է պահ, որ ասեք՝ վերջ, էլ չեմ զբաղվելու այս ծանրամարտով:
– Այդ սպորտային ճգնաժամը բոլոր մարզիկների հետ լինում է: Սպորտում հիասթափությունները շատ-շատ են լինում և, բնականաբար, պահեր են լինում, երբ չեմ ուզում անգամ մարզադահլիճ գնալ:
– Շարունակելո՞ւ եք ծանրորդի կարիերան, թե՞ այլ մասնագիտություն էլ կընտրեք։
– Անպայման շարունակելու եմ և բավականին երկար տարիներ: Բայց կարծում եմ՝ հետագայում սպորտով չեմ սահմանափակվի:
– Ո՞րն է Ձեր նպատակը:
– Օլիմպիական մեդալը:
