Իջևան-Երևան ավտոճանապարհին տեղի է ունեցել ՃՏՊ՝ հրդեհի բռնկմամբ. կան զոհեր և տուժածներ

Սևան-Գագարին ավտոճանապարհին՝ գազալցակայանի մոտակայքում, հունվարի 31-ին ժամը 00:12-ին տեղի է ունեցել ՃՏՊ՝ հրդեհի բռնկմամբ:

Ինչպես հայտնում են ՆԳՆ Փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Իջևան-Երևան ավտոճանապարհի 95-րդ կմ-ին «Mercedes-Benz C-Class» մակնիշի ավտոմեքենան դուրս է եկել ճանապարհի երթևեկելի հատվածից, հայտնվել դաշտամիջյան հատվածում և բռնկվել:

Հրդեհը մեկուսացվել է ժամը 00։37-ին, մարվել՝ 00:52-ին: Ավտոմեքենան այրվել է:

Մինչ փրկարարների կանչի վայր հասնելը՝ ուղևորներ Թ. Ա.-ն (ծնված 1997 թ․) տեղափոխվել է Հրազդանի ԲԿ, այնուհետև՝ Երևանի «Սուրբ Գրիգոր Լուսավորիչ» ԲԿ, իսկ Ն. Գ.-ն (ծնված 1997 թ․)՝ Սևանի ԲԿ: Թ. Ա.-ի առողջական վիճակը գնահատվել է միջին ծանրության, Ն. Գ.-ինը՝ ծանր կայուն։

Փրկարարներն ավտոմեքենայից մոտ 10 մ հեռավորության վրա հայտնաբերել են վարորդ Գ. Բ.-ի (ծնված 2002 թ․), ուղևորներ Թ. Բ.-ի (ծնված 1997 թ․), Ա. Ք.-ի (ծնված 1997 թ․) դիերը և մոտեցրել շտապօգնության ավտոմեքենային: