Թրամփին և նրա փաստաբանին պարտավորեցրել են 1 մլն դոլար վճարել Հիլարի Քլինթոնի դեմ «շինծու» հայց ներկայացնելու համար
ԱՄՆ Ֆլորիդա նահանգի դատարանը ԱՄՆ նախկին նախագահ Դոնալդ Թրամփին և նրա փաստաբաններից մեկին պարտավորեցրել է գրեթե 1 մլն դոլար վճարել 2016 թ. նախագահական ընտրություններում Թրամփի մրցակից, ԱՄՆ նախկին պետքարտուղար Հիլարի Քլինթոնի և մի շարք այլ անձանց դեմ շինծու հայց ներկայացնելու համար:
ԱՄՆ նահանգային դատավոր Դոնալդ Միդլբրուքսը Թրամփին մեղադրել է այն բանում, որ վերջինս «չարաշահել է դատական համակարգը»՝ քաղաքական նպատակներով «անլուրջ» հայցեր ներկայացնելով, ինչն, ըստ դատավորի, «խաթարում է օրենքի գերակայությունը» և «համարվում արդարադատության խոչընդոտում»։
«Այս գործը չպետք է բացվեր, այն բոլորովին լուրջ չէր ո՛չ փաստական առումով, ո՛չ էլ իրավական», – ասել է դատավոր Միդլբրուքսը:
Ինչպես հաղորդում է The Guardian պարբերականը, ԱՄՆ նախկին նախագահը և նրա փաստաբան Ալինա Հաբբան 2022 թ. մարտին հայց են ներկայացրել դատարան՝ մեղադրելով Քլինթոնին և Դեմոկրատական պետական հանձնաժողովին այն բանում, որ նախքան 2016 թ. ընտրությունները նրանք դավադրություն են կազմել ՀԴԲ-ի (Հետախուզության Դաշնային Բյուրո) և այլոց հետ, որպեսզի նախագահական մրցավազքի ժամանակ Ռուսաստանի հետ կապերի մասին կեղծ տեղեկություններ տարածեն և վարկաբակեն Թրամփին: Նրանք 70 միլիոն դոլարի փոխհատուցում էին պահանջում: Անցյալ տարվա նոյեմբերին ամբաստանյալները պատասխան միջնորդություն էին ուղարկել դատարան՝ նախկին նախագահի հայցերն անհիմն անվանելով և անձամբ Թրամփից և նրա փաստաբանից պահանջելով շուրջ 1 միլիոն դոլար։
Այսպիսով, դատարանը բավարարել է Քլինթոնի և մյուս մեղադրյալների միջնորդությունը և Թրամփին ու նրա փաստաբան Ալինա Հաբբային պարտավորեցրել գրեթե 938 000 դոլար վճարել այդ գործով ամբաստանյալներին:
