ԿԳՄՍ նախարարը պարգևատրեց «Տարվա լավագույններ» մրցույթում հաղթող ճանաչված 22 ծրագրերի հեղինակներին
ՀՀ կրթության, գիտության, մշակույթի և սպորտի նախարար Վահրամ Դումանյանը պարգևատրեց «Տարվա լավագույններ 2022» մրցույթում հաղթող ճանաչված 22 ծրագրերի հեղինակներին:
Հաղթող ծրագրերում ընդգրկված էին 33 մանկավարժներ: Ներկայացված ծրագրային առաջարկների գնահատման արդյունքում հանձնաժողովի սահմանած նվազագույն շեմը (հանրակրթական ուսհաստատությունների համար՝ սկսած 63 %–ից, նախադպրոցական ուսհաստատությունների համար՝ 59 %-ից) հաղթահարել է 22 ծրագրային առաջարկ, որից 11-ը՝ անհատական, 11-ը՝ խմբային։
ՀՀ կրթության, գիտության, մշակույթի և սպորտի նախարար Վահրամ Դումանյանը շնորհավորելով բոլոր ուսուցիչներին՝ ընդգծեց, որ մրցույթի նպատակն է խրախուսել հանրակրթական և նախադպրոցական ուսումնական հաստատությունների մանկավարժներին, տնօրեններին և ուսումնաօժանդակ անձնակազմի աշխատակիցներին, նպաստել նրանց կողմից նոր նախագծերի իրականացմանը, ինչպես նաև՝ տարածել առաջավոր փորձը և նպաստել հասարակության մեջ ուսուցչի հեղինակության բարձրացմանը:
«Տարբեր հարթակներում բազմիցս նշվել է, որ մեր բոլոր խնդիրները գալիս են կրթությունից և նախակրթությունից: Այդ ոլորտում այսօր իրականացնում ենք մի շարք նոր բարեփոխումներ: Իսկ արդեն երրորդ անգամ իրականացվող «Տարվա լավագույններ 2022» մրցույթին, ընդհանուր առմամբ, ներկայացվել է 185 հայտ, որոնք համապատասխանել են «Տարվա լավագույններ» մրցույթի կարգով սահմանված բոլոր պահանջներին»,- ասաց Դումանյանը:
ԿԳՄՍ փոխնախարար Ժաննա Անդրեասյանն ուրախությամբ նշեց, որ այս տարի ավելի շատ թվով հայտեր ունեցել են նախադպրոցական հաստատություններից: Ըստ փոխնախարարի՝ պետք է ամեն տարի խրախուսեն, որպեսզի նախադպրոցական հաստատությունների մասնակցությունն էլ ավելի մեծանա: Ստեղծվեն նորարարական ծրագրեր և օգտագործվեն նախադպրոցական ուսումնական գործընթացում:
«Այժմ նախադպրոցական ուսումնական հաստատությունների մանկավարժական աշխատակազմի համար իրականացվում են մի շարք բարեփոխումներ: Ես կարծում եմ, որ այդ ամբողջ գործընթացը նպաստելու է, որպեսզի նախադպրոցական հաստատությունները նույնպես մեծացնեն ակտիվությունը և էլ ավելի մեծ ոգևորությամբ մասնակցեն բոլոր հնարավոր ծրագրերին»,-ասաց փոխնախարարը:
«Հանրակրթական ուսումնական հաստատության ուսուցչական լավագույն ծրագիր կամ նախաձեռնություն» անվանակարգում հաղթող ճանաչված՝ Աբովյան քաղաքի թիվ 5 հիմնական դպրոցի նախնական զինվորական պատրաստության (ՆԶՊ) և անվտանգ կենսագործունեության ուսուցիչ Սամվել Սարգսյանն ասաց, որ իր ներկայացրած ծրագիրը ներառում է մի քանի առարկաների մասնակցությամբ մեկ դասի կազմակերպումը: Տվյալ դեպքում առաջատար առարկան պետք է լինի ՆԶՊ-ն, իսկ մյուս առարկաները պետք է օգնեն բարդ հասկացություններն ավելի պարզ աշակերտներին ներկայացնել:
Ըստ ուսուցչի՝ «Աշխարհագրություն» առարկան կարող է ինտեգրվել ռազմական տեղագրության գործում, «Երկրաչափություն» և «Ֆիզիկա» առարկաները կարող են օգնել կրակային պատրաստության գործում, «Ֆիզկուլտուրա» առարկան՝ շարային պատրաստության, իսկ «Գրականություն» և «Հայոց պատմություն» առարկաները՝ հայ ռազմարվեստի պատմության գործում:
«Տարվա լավագույններ 2022» մրցույթում ընդգրկված է վեց անվանակարգ: «Հանրակրթական ուսումնական հաստատության ուսուցչական լավագույն ծրագիր կամ նախաձեռնություն» անվանակարգում ներկայացվել է 144 հայտ, հաղթող է ճանաչվել 14 ծրագիր:
«Հանրակրթական ուսումնական հաստատության կառավարման լավագույն ծրագիր կամ նախաձեռնություն» անվանակարգում ներկայացվել է 14 հայտ, հաղթող է ճանաչվել 3 ծրագիր:
«Հանրակրթական ուսումնական հաստատության ուսումնաօժանդակ գործունեության լավագույն ծրագիր» անվանակարգում ներկայացվել է 14 հայտ, հաղթող է ճանաչվել 2 ծրագիր:
«Նախադպրոցական ուսումնական հաստատության մանկավարժական լավագույն ծրագիր կամ նախաձեռնություն» անվանակարգում ներկայացվել է 8 հայտ, հաղթող է ճանաչվել 2 ծրագիր:
«Նախադպրոցական ուսումնական հաստատության կառավարման լավագույն ծրագիր կամ նախաձեռնություն» անվանակարգում ներկայացվել է 4 հայտ: Այս անվանակարգում ոչ մի ծրագիր հաղթող չի ճանաչվել։
«Նախադպրոցական ուսումնական հաստատության ուսումնաօժանդակ գործունեության լավագույն ծրագիր» անվանակարգում ներկայացվել է 1 հայտ, որը ճանաչվել է հաղթող:
