Գյումրիում բացվեց ՌԴ նկարիչների միության անդամ Ալեքսեյ Դուրասովի անհատական ցուցահանդեսը
Գյումրու Գալերի 25 ցուցասրահում նոյեմբերի 12-ին բացվեց արվեստագետ, ՌԴ նկարիչների միության անդամ Ալեքսեյ Դուրասովի՝ «Սիրով՝ Գյումրուն» խորագրով ցուցադրությունը: Նկարիչն առաջին անգամ Հայաստան է ժամանել մարտին ու այդ ընթացքում, այցելելով Գյումրի, զարմացել քաղաքի գեղեցկությամբ: «Մարտին, երբ հայտնվեցի Գյումրիում, հմայված էի տեղի ճարտարապետության գեղեցկությամբ և ինքնատիպությամբ, քաղաքի բնակիչների բարությամբ ու կենսասիրությամբ: Մի քանի ամիս շարունակ ես ուսումնասիրում և նկարում էի իմ շրջապատը»,-մեզ հետ ունեցած զրույցի ժամանակ ասում է նկարիչը:
Վեց ամիս նկարիչը բնակվել է Գյումրիում ու այդ ողջ ընթացքում նկարել է քաղաքը՝ մարդկանց, շինությունները, փողոցը, այն ամենը, ինչը նրա կարծիքով առանձնահատուկ է դարձնում Գյումրին: Ռուս նկարիչը ցանկություն է հայտնել իր նկարներով պատմել Գյումրու մասին: «Հուսով եմ՝ այս ցուցադրությանը ներկայացվող գրաֆիկական աշխատանքների շարքով կարողացել եմ փոխանցել իմ հիացմունքը: Միգուցե, օտար մարդու թարմ հայացքը գյումրեցիների համար այլ գույնով բացահայտի հարազատ քաղաքը»,- ասում է Ալեքսեյ Դուրասով՝ ընդգծելով, որ ցուցահանդեսը հնարավոր դարձավ «Բեռլին ԱՐՏ» հոթելի համահիմնադիր, Գյումրիում Գերմանիայի պատվո հյուպատոս Ալեքսան Տեր-Մինասյանի և Հայաստանի գեղարվեստի պետական ակադեմիայի Գյումրու մասնաճյուղի ղեկավար Վահագն Ղուկասյանի ջանքերով:
