ԵՊՀ-ում տեղադրվեց գիտության վաստակավոր գործիչ պրոֆեսոր Երվանդ Տեր- Մինասյանի կիսանդրին
Երևանի պետական համալսարանի կենտրոնական մասնաշենքի նախասրահում կայացավ գիտության վաստակավոր գործիչ պրոֆեսոր Երվանդ Տեր-Մինասյանի կիսանդրու բացման հանդիսավոր արարողությունը։
«Արմենպրես»-ի հաղորդմամբ՝ ԵՊՀ ռեկտոր Հովհաննես Հովհաննիսյանը նշեց՝ համալսարանը մշտապես հիշում է նրանց, ովքեր ներդրում են ունեցել ԵՊՀ-ի կառուցման, բարգավաճման և զարգացման գործում։
«Երվանդ Տեր-Մինասյանը հսկայական դեր է ունեցել նաև հայ եկեղեցու կյանքում։ ԵՊՀ-ի ղեկավարությունը չէր կարող չհիշել նրան»,- ասաց ռեկտորը։
Մատենադարանի տնօրեն Վահան Տեր-Ղևոնդյանը նշեց՝ ուրախ է, որ Երվանդ Տեր-Մինասյանի պես գիտնականն իր արժանի տեղն է գտնում մյուս մեծերի շարքում։
«Երվանդ Տեր-Մինասյանը մեր իրականության մեջ ասորագիտության հիմնադիրն ու նահապետն է։ Եվրոպայում կրթություն ստացած գիտնականն այն սերնդից է, որը հիմնել է այս համալսարանը»,- նշեց Տեր-Ղևոնդյանը։
Քանդակի հեղինակը Սամվել Ղազարյան է։
