«Վարչապետի Գավաթ» մրցաշար՝ պարալիզացված աշխատանքներով Վարդենիս համայնքում

Վարդենիս խոշորացված համայնքում դեկտեմբերի 5-ի  ՏԻՄ ընտրություններից հետո համայնքի ավագանին, ըստ էության, դեռ չի գործում, համայնքապետարանի աշխատանքը, կարելի է ասել,  պարալիզացված է, սակայն դա չի խանգարում, որ համայնքում հունվարի 26-ին «Վարչապետի գավաթ» մրցաշար անցկացվի։

Հիշեցնենք, որ Վարդենիսի խոշորացված համայնքում 2021 թվականի դեկտեմբերի 5-ին տեղի ունեցած ՏԻՄ ընտրություններից հետո ավագանու 27 մանդատներից 13-ը «Քաղաքացիական պայմանագիր» խմբակցությանն էին, իսկ մյուս 2 խմբակցությունները միավորվել էին և ունեին ընդհանուր թվով 14 մանդատ: Դեկտեմբերի 30-ին համայնքապետարանում տեղի էր ունեցել ավագանու անդրանիկ նիստը, որի ժամանակ համայնքի ղեկավար ընտրվեց Ահարոն Խաչատրյանը, սակայն ավագանու ՔՊ-ական անդամները պնդում էին, որ այդ նիստը տեղի է ունեցել օրենքի խախտումով, և Ահարոն Խաչատրյանին չեն ընդունում՝ որպես համայնքապետ։ Ավելին, հունվարի 4-ին համայնքապետի երդմնակալության արարողությունը տեղի ունեցավ դրսում՝ համայնքապետարանի շենքի դիմաց, քանի որ նախկին համայնքապետ, ՔՊ-ական Արամ Մելքոնյանը ոստիկաններին հանձնարարել էր ավագանու ընդդիմադիր անդամներին ներս չթողնել։

Այդուհանդերձ, «Վարչապետի գավաթ» մրցաշարն անցկացվելու է,  հայտարարությունն արդեն տեղադրված է Վարդենիսի համայնքապետարանի ֆեյսբուքյան էջում, որին կից ներկայացված են համայնքային և մարզային փուլերի ժամանակացույցը․

«Վարդենիս խոշորացված համայնքի հարգելի՛ բնակիչներ, տեղեկացնում ենք, որ Գեղարքունիքի մարզում կանցկացվի «ՀՀ Վարչապետի գավաթ» սիրողական սեղանի թենիսի մրցաշարը երկու փուլերով՝ համայնքային և մարզային:

Ցանկացողները կարող են դիմել «Վարդենիսի թիվ 1 մարզադպրոց»:

Հիշեցնենք, որ 2021 թվականի սեպտեմբերի 19-ին Գեղարքունիքի Սևան քաղաքում տեղի ունեցավ «Վարչապետի գավաթ» հեծանվավազքը, ընդամենը 1 ամիս անց Երևան-Էջմիածին մայրուղում անցկացվեց «Վարչապետի գավաթ» սիրողական կրոսավազքը, վերջինի համար բյուջեից 35 միլիոն դրամ էր հատկացվել։

Նարեկ Խաչատրյան