Հայկ Մարությանի տեղակալների թիվը կավելանա
Տարածքային կառավարման և զարգացման նախարար Գնել Սանոսյանը Կառավարության համաձայնությանն է ներկայացրել նախագիծ, որով փոփոխություն է կատարվել «Երևան քաղաքում տեղական ինքնակառավարման մասին» և «Հանրային ծառայության մասին» օրենքներում: Ըստ այդմ Երևան քաղաքն այլևս չի ունենա գլխավոր ճարտարապետ, փոխարենը՝ Հայկ Մարությանի տեղակալների թիվը 4-ի փոխարեն կդառնա 5։
Մարությանի տեղակալների թվի ավելացումը, ըստ ընդունված որոշման, հնարավորություն կտա, որ Երևանի քաղաքապետը փոխքաղաքապետի միջոցով հնարավորություն ունենա արդյունավետ համակարգել ճարտարապետաքաղաքաշինական ոլորտի միավորները, իսկ Երևանի ճարտարապետին վերապահված որոշ նեղ մասնագիտական գիտելիքներ և փորձարարություն պահանջող գործառույթներ քաղաքապետարանը կառուցվածքային փոփոխություններ կատարելու միջոցով կտեղափոխի անվանի, փորձառու և արդյունավետ ճարտարապետական պրակտիկա ունեցող ճարտարապետների կոլեգիալ որոշումների ընդունման դաշտ:
Արդյունքում՝ կկարգավորվի Երևան քաղաքում քաղաքապետի տեղակալի՝ որպես քաղաքաշինության և ճարտարապետության ոլորտի համակարգողի առկայության հարցը, ինչը հնարավորություն կտա առավել արդյունավետ իրականացնել ճարտարապետության և քաղաքաշինության ոլորտում Երևանի քաղաքապետին տրված իրավասությունները:
