Պոլիտեխնիկական համալսարանում ռեկտոր են ընտրում
Այսօր Հայաստանի ազգային Պոլիտեխնիկական համալսարանում ռեկտոր են ընտրում։ Թվով 6 թեկնածուներ են առաջադրվել` Պարգև Բալջյան, Նորայր Հարությունյան, Արամ Միքայելյան, Դավիթ Ղազարյան, Ամալյա Մխիթարյան, Գոռ Վարդանյան։ Ժամը 18։00-ի դրությամբ բուհի զարգացման իր տեսլականը ներկայացրել են չորս թեկնածուները։
Բուհի Հոգաբարձուների խորհրդի 32 անդամներից ներկա են 30-ը, նրանցից մեկը մասնակցում է հեռավար եղանակով։
Նիստի սկզբում թեկնածուներից երկուսը` Պարգև Բալջյանը և Դավիթ Ղազարյանը, առաջարկեցին հետաձգել ընտրությունը։ Հարցը դրվեց քվեարկության։ Հոգաբարձուների խորհուրդը դեմ էր այս առաջարկին։
Բուռն քննարկվեց նաև թեկնածուների ելույթների` բաց կամ փակ լինելու հարցը։ Նիստի մասնակիցներից մեկը պնդեց, որ, բացի թեկնածուից և Հոգաբարձուների խորհրդի անդամներից, որևէ մեկը չպետք է ներկա լինի թեկնածուի ելույթին և հարց ու պատասխանին, քանի որ թեկնածուները կարող են լսել միմյանց ելույթները և հնչած մտքերն օգտագործել իրենց ելույթներում։ Նիստը շարունակվեց բաց ձևաչափով։
Նշենք, որ Հայաստանի ազգային պոլիտեխնիկական համալսարանի նախկին ռեկտորի պաշտոնավարման ժամկետը լրացել է, և այժմ ռեկտորի պարտականությունները կատարում է պրոռեկտոր Ռուբեն Ազգաշյանը։
Նա ասաց, որ մարտի 1-ն իրենց բուհի հիմնադրման օրն է, և շնորհավորեց ներկաներին։
