Խուան Գուայդոն գաղտնի հանդիպումներ է անցկացնում Վենեսուելայի զինվորականների հետ
Վենեսուելական ընդդիմության ներկայացուցիչները գաղտնի հանդիպումներ են անցկացրել հանրապետության զինվորականների եւ անվտանգության ծառայությունների աշխատակիցների հետ: Այս մասին Վենեսուելայի ընդդիմության առաջնորդ Խուան Գուայդոն հայտնել է այն հոդվածում, որը հունվարի 30-ին հրապարակվել է The New York Times թերթի կայքում:
«Մենք գաղտնի հանդիպումներ անցկացրեցինք զինծառայողների եւ անվտանգության ծառայությունների աշխատակիցների հետ,- նշել է Գուայդոն:- Մենք համաներում առաջարկեցինք բոլոր նրանց, ովքեր մեղավոր չեն ճանաչվել մարդկության դեմ հանցագործությունների մեջ»:
«Արդեն 50-ից ավելի պետություններ ինձ ճանաչել են Վենեսուելայի նախագահի պաշտոնակատար կամ Ազգային ժողովը՝ օրինական իշխանություն»,- հավաստիացրել է Գուայդոն:
Նա նշել է, որ դիմել է ՄԱԿ-ի գլխավոր քարտուղար Անտոնիու Գուտերիշին եւ մի շարք այլ միջազգային կազմակերպությունների՝ «հումանիտար ճգնաժամի հետեւանքների մեղմացման» հարցում աջակցություն տրամադրելու խնդրանքով:
«Ես սկսել եմ դեսպանների նշանակման, արտասահմանում արգելափակված ակտիվների որոնման եւ վերադարձման գործընթացը»,- հայտնել Է ընդդիմության առաջնորդը, հաղորդել է ՏԱՍՍ-ը:
