Հայկ Մարությանն ընդունել է ավտոբուսներ արտադրող Daimler Buses ընկերության ներկայացուցչին
Տրանսպորտային համակարգի արմատական բարեփոխման ծրագրի համաձայն, Երևանի քաղաքապետարանը սկսել է հանդիպում-քննարկումները ոլորտում հայտնի կազմակերպությունների հետ:
Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, քաղաքապետ Հայկ Մարությանը հանդիպել է Daimler Buses («Դայմլեր բասիս») ընկերության վաճառքների դեպարտամենտի տնօրեն Բերնդ Մեքի հետ:
Հանդիպմանը ներկայացվել է ընկերության գործունեությունը, մասնավորապես, ավտոբուսների ամբողջական արտադրության գործընթացը: Daimler Buses-ը գործարաններ ունի տարբեր աշխարհամասերում, հիմնական շուկաներն են Եվրոպան և Հարավային Ամերիկան: Քաղաքային ավտոբուսների արտադրությունում ընկերության շուկայի մասնաբաժինը Արևմտյան Եվրոպայում շուրջ 30% է, ընկերությունը ամենախոշոր մատակարարն է ողջ Եվրոպայում: Քաղաքապետարանում ներկայացվել են տարբեր մակնիշի, տարողության քաղաքային ավտոբուսներ, որոնք աշխատում են նաև հեղուկ գազով և հիբրիդային կամ ամբողջովին էլեկտրական մարտկոցներով:
Daimler Buses ընկերության վաճառքների դեպարտամենտի տնօրենը պատրաստակամություն է հայտնել շարունակել քաղաքապետարանի հետ համագործակցությունը և նշել, որ ընկերությունը հետաքրքրված է Երևանի տրանսպորտային համակարգի բարեփոխումների ծրագրերով:
Երևանի քաղաքապետն իր հերթին տեղեկացրել է, որ մոտ ապագայում պատրաստ կլինի մայրաքաղաքի տրանսպորտային ցանցի նախագծումն իրականացնող խորհրդատու կազմակերպության առաջարկների փաթեթը, որի համաձայն էլ պետք է իրականացվի քաղաքային տրանսպորտի բարեփոխումների ծրագիրը:
Հայկ Մարությանն ընդգծել է, որ քաղաքը բաց է՝ քննարկելու գործարար համագործակցությանը վերաբերող ցանկացած առաջարկ, որը միտված կլինի ոլորտի բարեփոխմանն ու կանոնակարգմանը և կհամապատասխանի մշակված նախագծով սահմանված պահանջներին:
Կողմերը պայմանավորվածություն են ձեռք բերել առաջիկայում քննարկել հստակ առաջարկներ՝ գործնականում փորձարկելով Երևանի երթևեկությանը համապատասխանող և քաղաքին հարմար ավտոբուսներ:
https://www.facebook.com/Yerevanofficial/videos/281269149217649/?__tn__=kC-R&eid=ARCHaAnN3VlclYFrlYdsBu3tFckIqpg8biujRVN6J1DJlSMv88Uh1qo3x4g5Q97IuG9XyTBajPUNXQGq&hc_ref=ARTDC48i9r5tBIVz40pXY9uNZvUm_aTQv7079PsjZvOs8cQarcxcrlfbuwmHmu2FQLM&fref=nf&__xts__[0]=68.ARAHhg6WkbCnan46xxKToP7Gj_TO7ZpOrCEOHtKG7blboGIQkQnYLCVxfTkxkXzuPstLB8WrfvspaPyH10t4nG0sxjRMD1YajpN8LUpYs0CPqEb9E8m88zJJQI-nch_uubxr87cP-Mv1XpAgN1-vMm0puRpubxNNo_0_fb-v7mxGPUDTg0xQ-lTIC8-nHONmhugYE0_iB5JOM0LNNqSOvdL8tehvHjcJvkY1sCCQfVcJMnnhrX_CHPAwK6iwYI-Az_9ZmvsPX-UQdHGd_xB9SMXJMH730Oz2bNAtosJY1_n9LlX2K8Tjk9gFOmVVrHpJFx4woxwniCjRyRuGn0c
