Իրանը երկու արբանյակ կարձակի սեփական արտադրության հրթիռակիրներով
Իրանը պլանավորում է առաջիկա շաբաթներին երկու արբանյակ արձակել սեփական արտադրության հրթիռակիրներով: Այդ մասին Իրանի նախագահ Հասան Ռոուհանին հայտարարել է հունվարի 10-ին կայացած հիշատակի արարողության ժամանակ, որը նվիրված էր երկրի նախկին նախագահ Ալի Աքբար Հաշեմի Ռափսանջանիի (1989-1997 թվականներ) մահվան երկրորդ տարելիցին:
«Առաջիկա շաբաթներին հայրենական արտադրության հրթիռակիրները տիեզերք դուրս կբերեն երկու արբանյակ»,- Ռոուհանիի խոսքը մեջբերում է Tasnim գործակալությունը: Նա հավելել է, որ «Իրանը հպարտանում է քաղաքացիական եւ պաշտպանական նշանակության իր հրթիռներով»:
Նախագահն ընդգծել է, որ «երկրի ներկայիս պաշտպանական կարողությունները Ռաֆսանջանիի վաստակն են»: «Հենց նա էր առաջինը, ով կարգադրություն արեց (միջուկային փորձարկումների համար) ցենտրիֆուգներ բերել Իրան՝ դրա շուրջ պայմանավորվելով Պակիստանի հետ»,- հավելել է քաղաքական գործիչը, հաղորդել է ՏԱՍՍ-ը:
