Թբիլիսիում հազարավոր նոր ծառեր են տնկելու անբուժելի հիվանդ սոճիների փոխարեն
Թբիլիսիում պատրաստվում են լայնամասշտաբ ծառատունկ իրականացնել: Այդ մասին հայտարարել է մայրաքաղաքի փոխքաղաքագլուխ Մայա Բիտաձեն: Այդ որոշումն ընդունվել է այն բանից հետո, երբ քաղաքապետարանը որոշում ընդունեց մայրաքաղաքում հատել տասնյակ հազարավոր այն սոճիները, որոնք վարակվել էին անբուժելի հիվանդությամբ:
Վերջերս անզեն աչքով նկատելի է, որ մայրաքաղաքի զբոսայգիներում եւ մյուս կանաչ գոտիներում սոճիների կանաչ գույնը փոխարինվել է շագանակագույնով: «Գալիք տարում մենք կտնկենք 24 հազար ծառ, դրանք մեծ ծառեր են լինելու քաղաքի ուրբանիստական մասում, եւ համեմատաբար ոչ մեծ՝ Թբիլիսիի լանջերին»,-ասել է Բիտաձեն:
Նա նաեւ նշել է, որ քաղաքապետարանը բոլոր ջանքերը կներդնի առողջ ծառերը փրկելու եւ ֆիտոսանիտարական մշակման մեթոդները բարելավելու համար: Նոր ծառատունկն արդեն սկսվել է Թբիլիսիի կենտրոնի Աղմաշենեբելի պողոտայում, որտեղ վարակված ծառերի փոխարեն տնկել են նորերը, հաղորդել է Sputnik-ը:
