Սպիտակ քաղաքի մի քանի ընտրատեղամասերում և Արևաշող գյուղում լույս չկա
«Այս պահին Սպիտակ քաղաքի մի քանի ընտրատեղամասերում և Արևաշող գյուղում լույս չկա»,- այս մասին 168.am-ի հետ զրույցում նշեց ՀՀԿ-ական նախկին պատգամավոր Հովհաննես Սահակյանը։
«Այս պահին լույսերն անջատված են, և փաստացի հնարավորություն չկա, որպեսզի աշխատանքներն իրականացնենք։ Մեր վստահված անձանցից տեղեկատվություն եմ ստանում, որ մեկ-երկու ընտրատեղամասում լույսերը վերականգնվել է, բայց այս պահին գրեթե ընտրատեղամասերի մեծ մասում լույսերը վերականգնված չեն»,- նշեց Հ. Սահակյանը։
Նա դժվարացավ ասել՝ էլեկտրականության վթարը միտումնավո՞ր են արել, թե՞ ոչ, քանի որ չգիտի, թե ինչ է կատարվում, սակայն, նրա կարծիքով՝ կազմակերպչական առումով պետք է ուշադիր լինեն, որպեսզի կարևոր ընտրությունների դեպքում նման խնդիրների չբախվեն։
«Մեր վստահված բոլոր անձանց և հանձնաժողովի անդամներին զանգահարել ենք, որպեսզի ուշադիր լինեն, և միտումնավոր որևէ գործողության դեպքում այլ քայլեր չլինեն»,- ընդգծեց Հովհաննես Սահակյանը։
Նա նաև նկատեց, որ հետևելով ընտրություների ընթացքին, տեսել է պասիվություն, սակայն արդյունքներն ամփոփելուց հետո հստակ կխոսի մարդկանց պասիվության կամ ակտիվության մասին։
Նա նաև հավելեց, որ այս պահին սպասում են էլեկտրականության վերականգնմանը, որպեսզի վերսկսեն աշխատանքները։
Զվարթ Խաչատրյան
