Բակո Սահակյանը շնորհավորական ուղերձ է հղել Աբխազիայի նախագահին
Արցախի Հանրապետության նախագահ Բակո Սահակյանը շնորհավորական ուղերձ է հղել Աբխազիայի Հանրապետության նախագահ Ռաուլ Խաջիմբային:
Ուղերձում ասված է.
«Մեծարգո Ռաուլ Ջումկովի,
Արցախի Հանրապետության ժողովրդի, իշխանությունների եւ անձամբ իմ անունից ի սրտե շնորհավորում եմ Ձեզ եւ եղբայրական Աբխազիայի ողջ ժողովրդին` Ազատագրման եւ Հայրենական պատերազմում տարած հաղթանակի օրվա կապակցությամբ:
2018 թվականը հոբելյանական է Աբխազիայի համար: 25 տարի առաջ Աբխազիայի ժողովուրդը հռչակեց իր անկախ եւ ինքնիշխան պետության ստեղծումը: 10 տարի առաջ Աբխազիայի անկախությունը ճանաչեց Ռուսաստանի Դաշնությունը՝ նշանավորելով Աբխազիայի պետականության միջազգային ճանաչման սկիզբը:
Քառորդ դարի ընթացքում եղբայրական Աբխազիան անցել է դժվարին, բայց եւ հերոսական ուղի: Աբխազիայի ժողովուրդը հաջողությամբ լուծում է պետականաշինության խնդիրները, անշեղորեն ամրապնդում եւ զարգացնում իր երկիրը:
Մեկ անգամ եւս շնորհավորում եմ Ձեզ, հարգարժա՛ն Ռաուլ Ջումկովի, եւ մաղթում Ձեզ ու Աբխազիայի ողջ ժողովրդին խաղաղություն, բարօրություն եւ բարգավաճում»:
