«Քաղաքական իրադարձությունները ցույց տվեցին, որ շատ արագ պետք է անցկացնել արտահերթ խորհրդարանական ընտրություններ». Նիկոլ Փաշինյան
Երևանի ավագանու ընտրությունները բացառիկ էին, լիարժեք հնարավորություն կար, որ քաղաքացին առանց որևէ պարտադրանքի գնար և իր քվեարկությունը կատարեր: Այս մասին Նյու Յորքից ֆեյսբուք սոցիալական ցանցի իր էջով ուղիղ հեռարձակմամբ նշեց ՀՀ վարչապետ Նիկոլ Փաշինյանն ՝ ամփոփելով Երևանի ավագանու ընտրությունների արդյունքները:
«Սա չափազանց կարևոր իրադարձություն է մեր քաղաքական կյանքի համար: Ուզում եմ բոլորիս շնորհավորել այս ընտրությունների կապակցությամբ, որովհետև այս ընտրությունները բացառիկ էին այն առումով, որ քաղաքացին չուներ որևէ պարտադրանք և հանգիստ կարող էր գնալ ընտրատեղամաս ու կատարել իր քաղաքացիական պարտքը»,-ասաց Նիկոլ Փաշինյանը:
Նա, շնորհավորելով Հայկ Մարությանին, մաղթեց ժողովրդահաճո գործունեություն և արդյունավետ աշխատանք Երևանի քաղաքապետի պաշտոնում: ՀՀ վարչապետը շնորհավորեց նաև «Բարգավաճ Հայաստան» կուսակցությանը, «Լույս» դաշինքին, որոնք նույնպես Երևանի ավագանու մաս կկազմեն: Նիկոլ Փաշինյանը նշեց, որ ուշադիր պետք է հետևել դիտորդների դիտողություններին, որպեսզի ընտրական համակարգը հասցվի բարձր մակարդակի:
«Շատ է քննարկվում ընտրություններին քաղաքացիների մասնակցության հարցը: Շատերը փորձում են ասել, թե մեծամասնությունը չի մասնակցել ու հետևություններ պետք է անել: Սրա հետ կապված ուզում եմ ասել, որ այդ փաստարկները ծիծաղելի են: Նախորդ ավագանու ընտրություններին ավելի քիչ մարդ է մասնակցել, և դա այն դեպքում, երբ մարդիկ գազելներով, ընտրակաշառքով հարկադրաբար բերման են ենթարկվել ընտրատեղամասեր: Երկրորդը, մեր ընտրական ցուցակները չեն արտահայտում այն իրական պատկերն, ինչը գոյություն ունի: Մեր շատ հայրենակիցներ 20-25 տարի առաջ հեռացել են երկրից, բայց շարունակում են մնալ ընտրացուցակներում: Դրանից բացի, ընտրակաշառքային ընտրություններում, նույնիսկ հաշվի չէին առնում մի հանգամանք, անկողնային տարիքով մարդկանց բերում էին ընտրատեղամասեր:Այսօր տարիքով մարդիկ պարտավորված չեն եղել ձայն ապահովելու: Այս ընտրություններին քաղաքացիների մասնակցությունը, նրանց տված մանդատը որևէ կասկածի տեղիք չի տալիս»,-ասաց Նիկոլ Փաշինյանը:
ՀՀ վարչապետը նշեց, որ խնդրել էր քաղաքացիներին քվեարկել նաև ԱԺ արտահերթ ընտրություններին հասնելու համար մանդատ տալու օգտին, որ սկսի քաղաքական ուժերի հետ քննարկումները: Նա շնորհակալություն հայտնեց քաղաքացիներին այդ վստահությունը տալու համար:
«Շատ բարձր եմ գնահատում այն փաստը, որ «Լույս» դաշինքի քաղաքապետի թեկնածու Արտակ Զեյնալյանը շնորհավորել է «Իմ Քայլը» դաշինքին, ԲՀԿ առաջնորդ Գագիկ Ծառուկյանը, Ժառանգությունը, «Օրինաց երկիր»-ը շնորհավորել են: Սա քաղաքական նոր մշակույթ է ինչը շատ կարևոր է: Ուզում եմ ասել, որ նորընտիր քաղաքապետ Հայկ Մարությանը, ավագանին կանցնի քաղաքի գործերին, իսկ մենք կանցնենք քննարկումներին քաղաքական ուժերի հետ, որպեսզի տեսնենք , թե ինչպես, ինչ ժամկետներում ենք անցնում արտահերթ ընտրություններին: Քաղաքական իրադարձությունները ցույց տվեցին, որ շատ արագ պետք է անցկացնել արտահերթ խորհրդարանական ընտրություններ: Քաղաքական անորոշությունը արգելակում է մեր տնտեսությունում ներդրումների ներգրավումը: Այս ընտրությունները ցույց տվեցին, որ այն խորհրդարանը, որը գործում է, ըստ էության, չունի գործելու մանդատ: Բոլոր խորհրդարանական ուժերը միասին վերցրած շատ քիչ ձայն հավաքեցին: Մեզ հարկավոր է ժողովրդին հնարավորություն տալ, որ նոր ընտրությամբ լիազորեն իրենց ցանկացած քաղաքական ուժին»,-ասաց Նիկոլ Փաշինյանը:
Նիկոլ Փաշինյանը բարձր գնահատեց ԱԺ ՀՀԿ խմբակցության ղեկավար Վահրամ Բաղդասարյանի հայտարարությունը, որ պատրաստ են բանակցություններ վարել, ԲՀԿ-ի ներկայացուցիչների հայտարարությունները: Նա ընդգծեց, որ ընտրությունների արդյունքները ցույց տվեցին, որ իշխանությունը մեծ վստահության ռեսուրս ունի:
«Այսօր ակնարկներ են հնչում, թե իշխանությունը վստահության մեծ ռեսուրս ունի և ընտրությունները կեղծելու կարիք չկա, իսկ ինչ կլինի, եթե իշխանության վարկանիշը ցածր լինի: Պատասխանը շատ պարզ է, եթե այդպես է, ուրեմն չի լինի այդ իշխանությունը: Մենք պետք է մոռանանք լցոնումները, լծակների կիրառումը, որոնցով փորձ էր արվում ժողովրդից իշխանությունը խլել: Այդ դեպքում հեղափոխությունը իմաստ չի ունենա… ավելի լավ է գետինը մտնենք, եթե ինչ-որ պահի կրիմինալին պիտի օգտագործենք: Հասկանում եմ, աչքը տեսածից է վախում, բայց կարծում եմ, որ մեր աչքը տեսնում է բաներ, որոնցով պետք է հպարտանալ: Հպարտանում եմ, խոնարհվում եմ ժողովրդի առաջ, սա ժողովրդի բացառիկ հաղթանակն է: Այս ընտրությունները ցույց տվեցին, որ քաղաքական պրոցեսները գտնվում են քաղաքացու ձեռքին: Համոզված եմ, մենք բոլորս սա կհամարենք արժեք»,-հավելեց վարչապետը:
Նա ընդգծեց, որ այսուհետ ժողովուրդն է որոշելու քաղաքական գործընթացները: Նիկոլ Փաշինյանը նշեց, որ ժողովրդի քվեն շատ պարտավորեցնող է, կասկած չկա, որ իրենք անմնացորդ նվիրված են և շարունակելու են նվիրվել իրենց գործին:
Նիկոլ Փաշինյանը տեղեկացրեց, որ նա պատրաստվում է մեկնել ՄԱԿ-ի կենտրոնակայան, որտեղ մասնակցելու է մի քանի միջոցառումների: Նախատեսված է վարչապետի ելույթը Նելսոն Մանդելայի 100-ամյակին նվիրված գագաթնաժողովին, դրանից բացի նա ելույթ կունենա Նյու Յորքի Մետրոպոլիտեն թանգարանում «Հայաստան» ցուցադրության բացմանը: Այսօր նաև հանդիպումներ նախատեսված ՄԱԿ-ի գլխավոր քարտուղար Անտոնիո Գուտերեշի, Կիպրոսի, Ռուանդայի ղեկավարների հետ: Սեպտեմբերի 25-ին ՀՀ վարչապետը ելույթ կունենա ՄԱԿ-ի գլխավոր ասամբլեայում: ԱՄՆ-ից հետո Նիկոլ Փաշինյանը կմեկնի Դուշանբե մասնակցելու ԱՊՀ երկրների ղեկավարների գագաթնաժողովին:
