Ինչ է քննելու ԱԺ քննիչ հանձնաժողովը
Ազգային ժողովն այսօր պատգամավորների նախաձեռնած արտահերթ նիստում քննարկում է ԱԱԾ տնօրենի և ՀՔԾ պետի հեռախոսային խոսակցության գաղտնալսման հարցով Քննիչ հանձնաժողով ստեղծելու հարցը։ ԱԺ Պետաիրավական և մարդու իրավունքների հանձնաժողովի նախագահ Գևորգ Կոստանյանը զեկուցեց, որ նախաձեռնության անհրաժեշտությունը պայմանավորված է 2 կարևոր հանգամանքով, որ առնվազն հիմնավոր կասկածներ են ստեղծվում առ այն, որ եթե ԱԱԾ տնօրենի և ՀՔԾ պետի խոսակցությունները ձայնագրվում են, նշանակում է, որ Սահմանադրությամբ և եվրոպական կոնվենցիաներով երաշխավորված յուրաքանչյուր անձի հեռախոսային խոսակցությունների գաղտնիության սկզբունքն է վտանգված, այսինքն՝ խնդիրը գլոբալ է:
Գաղտնալսման փաստի բովանդակային մասի կապակցությամբ Գ.Կոստանյանը նշեց, որ առկա է ներգրավվածություն, որը չպետք է տեղի ունենա արդարադատության իրականացման ընթացքում. «Հետևաբար՝ կարևոր հարց է ծագում՝ արդյոք երկրում ապահովվա՞ծ է յուրաքանչյուր անձի՝ արդար դատաքննություն ունենալու իրավունքը»:
«Ելք» խմբակցության պատգամավոր Էդմոն Մարուքյանը հայտարարեց, որ քանի որ գործով նախաքննություն է ընթանում, ԱԺ կանոնակարգ-օրենքով սամանափակում կա: Նա զարմանք հայտնեց, որ այդ սահմանափակումը վրիպել է Կոստանյանի աչքից.
«Սահմանափակման մեջ հստակ գրված է, որ չի կարող Քննիչ հանձնաժողով ստեղծվել, եթե նախաքննություն է ընթանում: Երկու դեպքերով էլ նախաքննություն է ընթանում՝ և՛ գաղտնալսման, և՛ քրեական գործին հնարավոր միջամտության հանգամանքով: Դրա համար ԱԺ-ն չի կարող ստեղծել այդպիսի հանձնաժողով»:
Գ. Կոստանյանը նկատեց, որ Մարուքյանը ճիշտ է, և նման հանգամանքը չէր կարող իրենց աչքից վրիպել։ Սակայն, ըստ նրա, իրենք չեն խոսում կոնկրետ քրեական գործերի մասին կամ կոնկրետ հանգամանքների, այլ խոսքը ձայնագրությունը գլոբալ քննարկման առարկա դարձնելու մասին է:
Է.Մարուքյանի խոսքով՝ կոնկրետ դեպքի վերաբերյալ են պատգամավորները ստորագրություն հավաքել, որի փաստով կա հարուցված քրգործ, իսկ ԱԺ կանոնակարգ-օրենքը թույլ չի տալիս ստեղծել քննիչ հանձնաժողով:
Գ. Կոստանյանը նկատեց, որ արդարադատությանը խոչընդոտելու փաստի կապակցությամբ քրգործ հարուցված չի. «Եթե տեքստի ձևակերպումը խնդիր է, մենք կարող ենք փոխել»։
