Արգենտինայի սենատորները հավանություն տվեցին նախկին նախագահ դե Կիրշների տները խուզարկելուն
Արգենտինայի խորհրդարանի վերին պալատն օգոստոսի 22-ին հավանություն է տվել սենատոր եւ պետության նախկին ղեկավար Քրիստինա Ֆեռնանդես դե Կիրշների բնակարանում եւ տներում խուզարկություն կատարելու դատարանի պահանջին՝ կաշառքների գործի հետաքննության շրջանակներում: Կողմ է քվեարկել 72-տեղանոց Սենատի 66 անդամ:
Այժմ իրավապահ մարմինները կկարողանան խուզարկություն կատարել խորհրդարանական անձեռնմխելիությունից օգտվող Ֆեռնանդես դե Կիրշների բնակարանում Բուենոս Այրեսում եւ նրա տներում Էլ Կալաֆատե եւ Ռիո Գալիեգոս քաղաքներում:
«Ես լկտի, կոպիտ, նվաստացուցիչ մեքենայությունների եւ մշտական հետապնդման զոհն եմ»,- նիստում ասել է Ֆեռնանդես դե Կիրշները: Նախկին նախագահի կարծիքով՝ գործող կառավարությունը դատավարությունն օգտագործում է իր դեմ, որպեսզի բնակչությանը շեղի երկրի տնտեսական խնդիրներից: «Եթե հաց չկա՝ անհրաժեշտ են հանդիսախաղեր»,- ասել է նա, հաղորդել է ՏԱՍՍ-ը:
