Բաց նամակ Արայիկ Հարությունյանին

Հարգելի՛ պարոն նախարար,

մի քանի ամիս շարունակ մեզ ասում էին, որ ուսանողական խորհուրդը լուծարված է, ուսանողական խորհրդի կանոնադրությունը չի գործում:

Վերջապես,  Ձեզ ուղղված մեր հարցադրումներն սպասված պատասխանը ստացան: Եվս մեկ անգամ փաստվեց, որ ԵՊԼՀ ՈւԽ-ի կանոնադրությունը գործող է: Սակայն միևնույն ժամանակ Ձեր ուղարկած նույն գրության մեջ տեղ է գտել մի միտք, որը շարադրված է հետևյալ կերպ. «Ուսումնասիրելով ԵՊԼՀ-ի ուսանողների կողմից իրականացված գործընթացների վերաբերյալ ներկայացված փաստաթղթերը, մայիսի 24-ին ուսանողների կողմից  հրավիրված համընդհանուր համաժողովի  ընթացքում կայացրած որոշման և ընդունված հռչակագրի դրույթները, համադրելով դրանք վերը նշված իրավական ակտերի պահանջների և կարգավորումների հետ, ինչպես նաև հաշվի առնելով ուսանողական համաժողովին ոչ միայն ըստ ֆակուլտետների ընտրված լիազոր ներկայացուցիչների, այլ շատ ավելի մեծ թվաքանակով ուսանողների մասնակցության հանգամանքը, պարզ է դառնում, որ ԵՊԼՀ-ի ԳՈՐԾՈՂ ուսանողական խորհուրդը լուծարելու, նոր ուսանողական խորհուրդ ձևավորելու և ընտրություններ կազմակերպելու գործընթացները բխում են ինքնակառավարման սկզբունքից և ուսանողների մեծ շրջանակի կամարտահայտումից, համապատասխանում են ՀՀ օրենսդրության, այդ թվում նաև 26.02.2012 թվականին հաստատված կանոնադրության պահանջներին և իրավաչափ են»:

Բոլորովին վերջերս Դուք երիտասարդության օրվա առթիվ Իջևանում երիտասարդների հետ հանդիպման ժամանակ հնչեցրիք նաև հետևյալը. «Ներկայիս օրենքի շրջանակներում էլ ուսանողությունն ունի լայն հնարավորություններ իրենց իրավունքները բուհի ներսում պաշտպանելու, իրենց խնդիրները վերհանելու և բուհի ղեկավարության հետ միասին լուծումներ գտնելու համար: Անցած երեք ամիսներից արդյունավետ գործողությունների մեկ օրինակ եմ ուզում բերել. կրթության և գիտության նախարարության հետ համատեղ Բրյուսովի անվան լեզվագիտական համալսարանի ուսանողները, դժգոհ լինելով իրենց ուսանողական խորհրդից, անցկացրեցին հանրաքվե, որին մասնակցեցին բոլոր ուսանողների կեսից ավելին և ըստ էության իրենց կանոնադրությամբ և օրենքով ունեցած հնարավորություններով լուծարեցին այդ ուսանողական խորհուրդը և հիմա պատրաստվում են նորը ձևավորել: Սա անցած ամիսների ուսանողության հետ մեր նախարարության համագործակցության  լավագույն օրինակներից մեկն է» :

Երկար տրամաբանելը նույնիսկ չօգնեց մեզ ու ոլորտի շատ մասնագետների հասկանալ, թե ինչ իրավական հիմքով Դուք կարող եք ասել, թե իբրև ԵՊԼՀ ուսանողական խորհուրդը լուծարվել է: Փորձե՞լ եք արդյոք ճշտել Ձեր մեջբերած ստորագրահավաքի իսկությունը և համագումար կոչվող ինչ-որ հանդիպման մանրամասները: Ուզում ենք հասկանալ՝ երբվանից է նման ցածր մակարդակով անցկացված, առանց տեքստ, կեղծարարությունների վրա հիմնված, բռնի, անօրինական ստորագրահավաքը համարվում ԻՐԱՎԱԿԱՆ:

Երբվանի՞ց է, համալսարանի ղեկավարության անմիջական հորդորով, մասնակցությամբ, աջակցությամբ և կազմակերպմամբ անցկացված ինչ-որ ժողով համարվում համագումար՝ այն էլ անհասկանալի հռչակագրի ելքով: Ժողով, որը փաստացի կազմակերպեց բուհի ադմինիստրացիան, սատարման ելույթով հանդես եկավ պրոռեկտորը՝ անտեսելով ուսանողական ինքնակառվարման փիլիսոփայությունն ու դրա բոլոր նորմերը (նշվածի մի մասի փաստերը ԵՊԼՀ-ի ուսանողական խորհրդի պաշտոնական էջում ներկայացված են և այժմ էլ հասանելի են):  Հետաքրքիր է իմանալ, թե ինչպես 180 հոգանոց դահլիճը կարողացավ ապահովել եռակի անգամ ավել ստորագրություն:  Հասկանալի է, երևի ճնշող մեծամասնությունն օնլայն է մասնակցել ու, ոգևորված «նմանը չունեցող» հռչակագրով, հեռախոսով հայտնել, որ իրենց անուն-ազգանունը գրեն և ստորագրեն:

Առնվազն զավեշտալի է, որ Դուք, պարո՛ն նախարար, հայտարարում եք՝ այս ամենն իրավաչափ է, և, փաստորեն, միակողմանի դիտարկելով հանգամանքները, փաստերն ու իրականությունը՝ այս երևույթը համարում եք ինքնակառավարման դրսևորում և օրինակելի ձև ինքնակառավարման իրացման: Հաշվի առնելով այն, որ Ձեր կողմից ուղարկված գրության համաձայն` ԵՊԼՀ ուսանողական խորհրդի ԳՈՐԾՈՂ կանոնադրության բոլոր դրույթները կապված այս հարցի հետ անտեսվում են՝ խնդրում ենք տրամադրել ստորագրահավաքի և այսպես կոչված համագումարին մասնակցած ուսանողների ստորագրությունների պատճենները:

Պահանջում ենք նաև կարճ ժամկետում տրամադրել Ձեր կողմից հնչեցրած «ԵՊԼՀ ուսանողական խորհուրդը լուծարված է» արտահայտության համար հիմք հանդիսացող բոլոր օրենքները, կարգերը, իրավական ուժ ունեցող այլ փաստաթղթեր, ինչպես նաև Ձեր ուղարկած գրության մեջ նշված «համարում ենք իրավաչափ» նախադասության իրավական հիմքերը: Կոչ ենք անում չփորձել ուսանողական խորհուրդը համարել բուհի կամ պետական գերատեսչության  որևէ ստորաբաժանում և չոտնահարել ինքնակառավարման՝ աշխարհում ընդունելի սկզբունքները:

Եվս մեկ անգամ ամենայն պատասխանատվությամբ ու մեր երկրում օրենքի գերակայության նկատմամբ մեծ վստահությամբ հայտարարում ենք՝ ԵՊԼՀ ուսանողական խորհուրդը գործող կանոնադրությամբ գործող կառույց է, և ԱՅՆ ՉԻ ԿԱՐՈՂ ԴԱԴԱՐԵԼ ԳՈՅՈՒԹՅՈՒՆ ՈՒՆԵՆԱԼ քանի դեռ ինչ-որ անօրինական ստորագրահավաք և այսպես կոչված հակաիրավական «համագումար» են մեջբերվում որպես հիմք՝ շրջանցելով հարցին առնչվող բոլոր իրավական ակտերը և հակասելով ԵՊԼՀ ուսանողական խորհրդի կանոնադրությամբ ամրագրված դեպքերին և դրույթներին:

Վստահ ենք, որ այսքան ամիսների ընթացքում այս ամենին առնչվող իրավական հիմքերի առկայության դեպքում դրանք վաղուց արդեն մեզ ներկայացված կլինեին:

ԵՊԼՀ ուսանողական խորհրդի նախագահ Ռոզա Հակոբյան