Ջենովայում զոհվածների ընտանիքների գրեթե կեսը հրաժարվել է պետական հուղարկավորումից
Իտալական Ջենովա քաղաքում ավտոմոբիլային կամրջի փլվելու հետեւանքով զոհվածների ընտանիքների գրեթե կեսը հրաժարվել է իրենց ազգականների պետական հուղարկավորումից: Այդ մասին օգոստոսի 17-ին հայտնել է la Stampa թերթը:
Օգոստոսի 18-ին Իտալիայում ազգային սուգ է հայտարարված:
Հուղարկավորությունների պետական արարողությունը՝ երկրի նախագահի եւ վարչապետի մասնակցությամբ, Ջենովայում տեղի կունենա նույնպես օգոստոսի 18-ին: Ներկայում իրենց որոշման մասին հայտարարել են 38 զոհվածներից 17-ի ազգականները, ողբերգության եւս 7 զոհերի ընտանիքներ դեռեւս չեն կողմնորոշվել:
«Իմ որդին թիվ չի դառնա մահերի ցուցակում… Ես կհասնեմ արդարության նրա ու մյուսների համար… Մենք ցանկանում ենք ոչ թե ֆարսային հուղարկավորություն, այլ տնային արարողություն մեր եկեղեցում: Այսօրվանից պատերազմ է սկսվում ճշմարտության եւ արդարության համար, նման բան չպետք է կրկնվի»,- Facebook-ում գրել է զոհվածներից մեկի հայրը: Նրա որդին երեք ընկերների հետ հողին է հանձնվելու օգոստոսի 17-ին:
Իր հերթին զոհվածներից մեկի մայրն այն կարծիքին է, որ միջադեպը տեղի է ունեցել պետության մեղքով: «Քաղաքական գործիչներն աչքներիս չերեւալու փոխարեն անամոթաբար իրենց են ցուցադրում»,- հայտարարել է նա:
Ջենովայի մերձակա կամրջի 200-մետրանոց հատվածի փլուզումը տեղի է ունեցել օգոստոսի 14-ի ցերեկը: Իշխանությունները ենթադրում են, որ դրա պատճառը կարող էր դառնալ օբյեկտի կոնստրուկցիաների թուլացումը: Կամրջի վիճակը, ինչպես նշում են իտալական ԶԼՄ-ները, վաղուց էր մտահոգում մասնագետներին:
Վերջին տվյալների համաձայն, ողբերգության զոհ է դարձել 38 մարդ, այդ թվում՝ չորս ֆրանսիացի եւ երկու ալբանացի: Եվս 15 մարդ վնասվածքներ է ստացել, նրանցից տասի վիճակը գնահատվում է ծանր, հաղորդել է ՌԻԱ Նովոստին:
