«Պետք է ամեն ինչ անենք՝ մեր հակառակորդի ճամբարում տարաձայնություններ սերմանելու ուղղությամբ». Արման Նավասարդյան
Արտակարգ և լիազոր դեսպան Արման Նավասարդյանի կարծիքով՝ Ռուսաստանի նկատմամբ ԱՄՆ պատժամիջոցների կիրառումը տհաճ երևույթ է այն առումով, որ մեկ ամիս առաջ տեղի ունեցավ Պուտին-Թրամփ հանդիպումը, և դա իրեն չարդարացրեց։
«Թրամփը կարծես թե փորձում է ամեն ինչ անել, որ հարաբերությունները նորմալանան, բայց ԱՄՆ-ն ը մնում է ԱՄՆ, այնտեղ կան ռազմական արդյունաբերության շահեր, Պենտագոնը, որն իր խնդիրներն ունի, նույնիսկ Թրամփի շրջապատում կա ուժեղ դիմադրություն։ Պետքարտուղարությունը, փաստորեն, բանանի կեղև է դնում նրա ոտքերի տակ»,- այսօր լրագրողների հետ հանդիպման ընթացքում ասաց դեսպանը։
Ինչ վերաբերում է Իրանին, ապա դեսպանն ասաց, որ ԱՄՆ-ը պատժամիջոցները փորձում է շարունակել տարբեր ոլորտներում, ինչը կարող է լուրջ խնդիրներ առաջացնել Թեհրանի համար. «Թրամփը հայտարարեց, որ, եթե լինեն պետություններ, որ չընթանան իր քաղաքական գծին համահունչ և շարունակեն առևտրատնտեսական հարաբերություններն Իրանի հետ, ապա ԱՄՆ-ը կխզի հարաբերությունները դրանց հետ։
Չինաստանը, Հնդկաստանը, Թուրքիան հայտարարեցին, որ նեցուկ չեն կանգնում ԱՄՆ-ի որոշմանը։ Եվրոպան փորձում է հավասարակշռել, բայց եթե ԱՄՆ-ը շարունակի այդ քաղաքականությունը, Եվրոպան չի կարող տարանջատվել նրանից։ Այլ պետությունների հետ Հայաստանի հարաբերությունների նկատմամբ ԱՄՆ-ի վերաբերմունքը միշտ բավական մեղմ է եղել, ես նկատի ունեմ ՌԴ-ի հետ մեր հարաբերությունները։ ԱՄՆ-ը կարծես ըմբռնումով է մոտենում, որ լինելով սահմանակից երկիր և լինելով շրջափակման մեջ՝ Հայաստանը չի կարող հարաբերություններ չունենալ Իրանի հետ»։
Թե այս ամենն ինչ շարունակություն կունենա, դեսպանը դժվարացավ ասել, քանի որ, ըստ նրա՝ Թրամփն արագ է փոխում որոշումները։
«Հետաքրքիր է, թե ինչ դիրքորոշում կունենա այս հարցում Ադրբեջանը։ Այստեղ կա նաև Իսրայելի հարցը։ Ստացվում է՝ Իսրայել-Ադրբեջան, Իսրայել-Ադրբեջան-Իրան, և այս բոլորի շուրջը պտտվում են Հայաստանի շահերը։ Եթե ուզում ենք մեր դիվանագիտությունը հաջողություն ունենա, պետք է ամեն ինչ անենք՝ մեր հակառակորդի ճամբարում տարաձայնություններ սերմանելու ուղղությամբ։ Մասնավորապես, պետք է օգտագործենք Իսրայելի հետ հարաբերությունները»։
Մանրամասները՝ 168.am-ի տեսանյութում
