Գերմանացի աստղանավորդը ՄՏԿ-ից լուսանկարել է երաշտից տուժած Եվրոպան

Աստղանավորդ Ալեքսանդեր Հյորսթը Միջազգային տիեզերակայանից (ՄՏԿ) լուսանկարել է կենտրոնական Եվրոպան եւ, մասնավորապես Գերմանիան՝ նպատակ ունենալով ցույց տալ երաշտի մասշտաբները, որն ընդգրկել է տարածաշրջանը: Լուսանկարները նա հրապարակել է Twitter-ում:

400 կիլոմետր բարձրությունից Եվրոպան իրենից ներկայացնում է «ցնցող տեսարան»՝ չորացած հողով, նշել է աստղագնացը: «Այն, ինչը պետք է կանաչ լիներ, այժմ շագանակագույն է: Երբեք նման բան չեմ տեսել»,-գրել է նա: Հյորսթն առանձին հրապարակել է գործնականում ամբողջովին շագանակագույն Պորտուգալիայի լուսանկարը. «Փոշու, ծխի եւ ավազի խառնուրդի տեսք ունի»,-մեկնաբանել է նա:

Եվրոպական երկրներում այս տարվա հուլիս եւ օգոստոս ամիսներին մոլեգնում է անոմալ տապը: Գերմանիայի գյուղացիների միության (DBV) տվյալների համաձայն, 2018 թվականի շոգ ամառը Գերմանիային խոստանում է վերջին 100 տարվա ընթացքում վատագույն բերքը:

Բացի այդ, երաշտը հանգեցրել է երկրի խոշոր գետերի ծանծաղացման: Տապի պատճառով անտառային հրդեհներ են բռնկել Հունաստանում, Պորտուգալիայում եւ Շվեդիայում: Ինչպես նշում են տեղական իշխանությունները եւ ԶԼՄ-ները, հուլիսյան հրդեհների զոհերի թիվը Հունաստանում հասել է 91-ի, իսկ Պորտուգալիայում՝ առնվազն 44-ի: Անտառներ են այրվում նաեւ Իսպանիայի հարավում: Կրակը նաեւ 25 հազար հեկտար անտառ է ոչնչացրել Շվեդիայում, հաղորդել է ՏԱՍՍ-ը:

Just had a chance to take my first photos of dried-out Central Europe and Germany since a few weeks, and was shocked. What should have been green, is now all brown. Never seen it like this before. #Horizons pic.twitter.com/o2XoddPdrM

— Alexander Gerst (@Astro_Alex) August 6, 2018