«Չենք կարող հեռարձակել մորուքով կնոջ մասնակցությամբ մրցույթ». Թուրքիան չի մասնակցի Եվրատեսիլին
Թուրքիան այս տարի նույնպես չի պատրաստվում մասնակցել Եվրատեսիլ երգի մրցույթին։ Այդ մասին հայտարարել է թուրքական «TRT» պետական հեռուստաընկերության գլխավոր տնօրեն Իբրահիմ Էրենը։
Ըստ վերջինիս՝ պատճառը նախ քվեարկության համակարգն է, ինչպես նաև այն, որ այդ երգի մրցույթին մասնակցում են այնպիսի մարդիկ , ինչպիսին է օրինակ «Մորուքավոր կին» մականունը ստացած ավստրիացի երգչուհի Կոնչիտա Վուրսթը, ով միաժամակ իրեն համարում է և՛ կին և՛ տղամարդ։
Թուրք տնօրենի՝ խոսքերով, իրենք չեն կարող ժամը 21։00-ին հեռարձակել մի երգի մրցույթ, որին մասնակցում է «մորուք պահող, կիսաշրջազգեստ հագնող և սեռական կողմնորոշում չունեցող ինչ-որ մի ավստրիացի, այն դեպքում երբ այդ ժամին երեխաները դեռևս քնած չեն»։
2018թ.-ի Եվրատեսիլի մրցույթը անցկացվելու է Պորտուգալիայում։
Հիշեցնենք, որ վերջին անգամ Թուրքիան 2012թ. է մասնակցել Եվրատեսիլին: Սակայն այնուհետև երկրում մրցույթի ազգային հեռարձակողը հանդիսացող «TRT» հեռուստաընկերության տնօրեն Իբրահիմ Շահինը հայտարարել էր, որ Թուրքիան այլևս չի մասնակցելու մրցույթին, քանի որ համաձայն չէ կանոնների փոփոխությանը, համաձայն որոնց, հաղթողը որոշվում է հեռուստադիտողի և ժյուրիի քվեարկության արդյունքների գումարման միջոցով:
