«Սանիտեքի» տնօրենը ընդունեց, որ սխալներ են թույլ տվել. նա հանդիպեց բողոքի ակցիայի դուրս եկած «Ելքի» անդամների հետ
Այս պահին Երևանի ավագանու «Ելք» խմբակցության անդամները բողոքի ակցիա են իրականացնում «Սանիտեք» ընկերության շենքի մոտ: Նրանք հայտարարում են, որ ամբողջ Երևանը աղբի և գարշահոտության մեջ է, ու պահանջում են, որ ընկերությունը խնդրին լուծում տա:
Քիչ առաջ խմբակցության անդամ Անի Սամսոնյանն ընթերցեց իրենց բաց նամակը և հայտարարեց, որ ընկերության ղեկավարն անձամբ 5 րոպեի ընթացքում պետք է մոտենա իրենց և վերցնի նամակը:
Մի քանի րոպե անց ընկերության տնօրեն Նիկոլաս Էլ Թավիլը եկավ խմբակցության անդամների մոտ, զրուցեց նրանց հետ և վերցրեց նամակը:
«Ելքը» պահանջում է 7 օրվա ընթացքում դատարկել աղբամանները և մաքրել քաղաքը: Ընկերության տնօրենն ընդունեց, որ իրենք խնդիրներ ունեն և սխալներ են թույլ տվել, և ամենօրյա ռեժիմով աշխատանքներ են իրականացնում խնդիրները լուծելու համար: Նա խոստացավ, որ կծանոթանա նամակի բովանդակությանը, և ամեն ինչ կանեն խնդիրները լուծելու համար:
«Ելքի»անդամները նաև ասում են, որ եթե խնդիրները 7 օրվա մեջ չլուծվեն, իրենք դիմելու են քաղաքապետարանին, որպեսզի դադարեցվի «Սանիտեքի» գործունեությունը:
