ՌԴ կալանավայրերից մեկում մահացած ազգությամբ հայ երիտասարդի քույրը պնդում է՝ եղբայրը խոշտանգվել է և սպանվել
Ռուսաստանի կալանավայրերից մեկում մահացել է 33-ամյա Գոռ Հովակիմյանը: Նրա քույրը՝ Անի Սիմոնյանը, դեպքի հետ կապված, նամակ է ուղարկել «novayagazeta» կայքի խմբագրություն՝ խնդրելով դեպքին հանրային հնչեղություն տալ: Անի Սիմոնյանը նամակում գրել է, որ իր եղբայրը խոշտանգվել և սպանվել է, սակայն քրեական գործ չի հարուցվել: Կալանավայրի ղեկավարությունն էլ փորձել է թաքցնել հարազատներից մահվան փաստը:
«Երկար ժամանակ որևէ տեղեկություն չկար Գոռի մասին, սովորաբար նա ամսվա մեջ մեկ անգամ զանգահարում էր: Շատ էինք անհանգստանում, հուլիսի 11-ին զանգահարեցինք կալանավայր և մեզ փոխանցեցին, որ նա առողջ է, նրա հետ ամեն ինչ կարգին է: Քանի որ մայրս շատ անհանգիստ էր, հաջորդ օրը գնաց կալանավայր և տեսակցություն խնդրեց, նոր միայն այդ ժամանակ ասել են, որ նա մահացել է հուլիսի 6-ին: Այսինքն՝ մահվանից 6 օր էր անցել, սակայն ընտանիքին ոչինչ չէին ասել»,-գրել է Անի Սիմոնյանը: Նա պնդում է, որ կալանավայրի ղեկավարությունը թաքցրել է Գոռի մահվան փաստը, որպեսզի դին ճանաչվի չպահանջված և հուղարկավորվի առանց հարազատներին հանձնելու, մահվան իրական պատճառն էլ չբացահայտվի:
Դիահերձարանում հարազատները տեսել են խոշտանգման, էլեկտրաշոկերի բազմաթիվ հետքեր Գոռի մարմնի վրա, ոտքերի և ձեռքերի մատները կոտրված:
«Մարմնի վրա ողջ տեղ չի եղել, միայն դեմքին ձեռք չեն տվել»,-նշել է Անի Սիմոնյանը:
Ընտանիքի անդամները խնդրել են դիահերձման արձանագրության պատճենը, սակայն չեն տվել՝ ասելով, որ դատախազն ու դատական փորձագետը ստորագրել են: Որպես մահվան պատճառ նշված է երկկողմ թոքաբորբը:
Գոռ Հովակիմյանը դատապարտված է եղել 8 տարվա ազատազրկման:
