«Ընդունում եմ մեր հատուկ ծառայությունների եզրակացությունը, որ Ռուսաստանը միջամտել է 2016-ի ընտրություններին». Թրամփ
Նախագահ Դոնալդ Թրամփը գոհ է մնացել Վլադիմիր Պուտինի հետ իր հանդիպումից: Իր թվիթերում Թրամփը գրել է, որ Պուտինի հետ հանդիպումն ավելի լավն էր քան նույնիսկ ՆԱՏՕ-ի դաշնակիցների հետ բանակցությունները: Այս մասին տեղեկացնում է «Ամերիկայի ձայնը»:
Հանդիպմանը հետեւած ասուլիսի ընթացքում Դոնալդ Թրամփի հայտարարությունները, սակայն, ոմանց կարծիքով կասկածի տակ դրեցին ԱՄՆ-ի նախագահի վստահությունը սեփական հատուկ ծառայությունների նկատմամբ: Գագաթաժողովի հաջորդ օրը արդեն Վաշինգտոնում նախագահ Թրամփը ստիպված էր հստակեցնել Հելսինկիում հնչած իր հայտարարությունները.
«Ես լիարժեք վստահություն ունեմ Ամերիկայի հզոր հետախուզական գործակալությունների նկատմամբ: Միշտ ունեցել եմ: Ու չնայած Ռուսաստանի գործողությունները որեւէ կերպ չեն ազդել ընտրությունների արդյունքների վրա, ես պարզ հայտարարում եմ, որ ընդունում եմ մեր հատուկ ծառայությունների եզրակացությունը, որ Ռուսաստանը միջամտել է 2016-ի ընտրություններին»:
Անհրաժեշտ է նշել, որ ասուլիսի ընթացքում Դոնալդ Թրամփը պնդում էր, որ 2016-ի ընտրությունների ընթացքում չի եղել որեւէ համագործակցություն իր նախընտրական թիմի եւ Ռուսաստանի միջեւ, մինչդեռ Վլադիմիր Պուտինը պնդում էր, որ Ռուսաստանը չի միջամտել ԱՄՆ-ի ընտրություններին: Այսպիսով, Թրամփի «no collusion»՝ ոչ մի պայմանավորվածություն եւ Պուտինի «no meddling»՝ ոչ մի միջամտություն արտահայտությունները տարբեր իմաստներ էին պարունակում:
Սակայն, Թրամփի խոսքերը, որ Վլադիմիր Պուտինը պնդում է, որ միջամտություն չի եղել, զայրացրել էին ընդդիմադիր Դեմոկրատական կուսակցությանը:
«Անմիտ եւ վտանգավոր է, երբ Միացյալ Նահանգների նախագահն աջակցում է նախագահ Պուտինին, ընդդիմանալով ամերիկյան իրավապահներին, ամերիկյան զինվորականներին եւ ամերիկյան հետախուզական գործակալություններին», – նշել է Սենատում դեմոկրատական փոքրամասնության ղեկավար սենատոր Չաք Շումերը:
Անհանգստացած են նաեւ ԱՄՆ-ի եվրոպացի դաշնակիցները, որոնցից մի քանիսի կարծիքով, աջակցելով Վլադիմիր Պուտինին նախագահ Թրամփը հեռանում է ժողովրդավարության արժեքներից:
«ԱՄՆ-ի նախագահը փորձում է հրահրել, կիսել Եվրամիությունը: Նա մեզ հիշատակում է ինչպես թշնամիների եւ դա սխալ է»,- նշում է Գերմանիայի՝ Եվրոպայի հարցերով նախարար Մայքլ Ռոթը:
Կողմերին փորձեց հաշտեցնել Կոնգրեսի Ներկայացուցիչների պալատի հանրապետական ղեկավար Փոլ Ռայնը, ով ընդգծեց, որ Կոնգրեսում անցած հետաքննությունն ապացուցել է՝ Ռուսական միջամտություն 2016-ին եղել է:
«Մենք կանգնած ենք ՆԱՏՕ-ի մեր դաշնակիցների եւ բոլոր այն երկրների կողքին, որոնք դիմակայում են ռուսական ագրեսիային: Վլադիմիր Պուտինը չի կիսում մեր արժեքները»:
Դոնալդ Թրամփը իր հայտարարության մեջ հիշեցրել է, որ Վլադիմիր Պուտինի հետ ձեռք բերված նախնական համաձայնությունները կարող են զգալի բարելավել համաշխարհային անվտանգության մակարդակը՝ խորհուրդ տալով ուշադրությունից բաց չթողնել հանդիպման դրական արդյունքները:
