Կվերանորոգվի՞ «Մեր մանկության տանգոն» ֆիլմում նկարահանված շենքը
Գյումրու Աճեմյան 2 հասցեում գտնվող հայտնի պատշգամբում 1984թ. նկարահանվել են «Մեր մանկության տանգոն» ֆիլմի մի քանի հայտնի տեսարաններ, սակայն 34 տարի անց, ֆիլմի մասին այդ մասին հիշեցնում է միայն տեղադրված ցուցատախտակը: Պատշգամբն ու շենքը գտնվում են կիսաքանդ վիճակում, իսկ պատասխանատու կառույցները ժամանակավորապես սառեցրել են դրանք նորոգելու աշխատանքները:
«Արմենպրես»-ի հետ զրույցում Գյումրու քաղաքապետ Սամվել Բալասանյանը հայտնեց, որ վերանորոգման նախագիծն էլ կա, կառուցման գումարի չափն էլ է որոշված:
«Երբ դեռ Արմեն Ամիրյանն էր նախարար, մշակույթի նախարարությունից եկան, ուսումնասիրեցին, ռուսական ընկերության հետ ծրագիրը կազմեցին: Նախահաշվարկային փաստաթղթերով վերանորոգումը պետք է կազմեր մոտ 340.000 դոլար»,- ասաց Բալասանյանը:
Նախագծի համաձայն` վերանորոգման աշխատանքներից հետո շենքի մի մասը պետք է դառնար թանգարան, իսկ մյուս հատվածն օգտագործվեր որպես այլ մշակութային հաստատություն:
«Շենքն արտաքինից որևէ փոփոխություն չի կրելու: Այն բացարձակապես նույնությամբ պահպանվելու է, որովհետև մեծ մշակութային արժեք է ներկայացնում քաղաքի համար»,- նշեց Գյումրու քաղաքապետը:
Մշակույթի նախկին նախարարը նախորդ տարվա նոյեմբերին «Արմենպրես»-ին տեղեկացրել էր, որ պատրաստ է նաև շենքի վիրտուալ նախագիծը:
Շենքը գտնվում է մշակույթի նախարարության հաշվեկշռում: Նորանշանակ նախարար Լիլիթ Մակունցի մամուլի քարտուղար Անի Սմբատյանը հայտնեց, որ այս պահին ծրագրի մեջ որևէ փոփոխություն չկա, բայց վերանորոգման ուղղությամբ դեռ կոնկրետ քայլեր չեն ձեռնարկվում:
Նորայր Շողիկյան
Արմենուհի Մխոյան
