ԻՊ-ի զինյալները լայնածավալ գրոհ են սկսել Պալմիրայի ուղղությամբ
«Իսլամական պետություն» ահաբեկչական խմբավորումը լույս մայիսի 30-ի գիշերը ընդգրկուն գրոհ է սկսել Սիրիայի Հոմսի նահանգի արեւելյան շրջանում: Այդ մասին հայտնել է «Ալ Մասդար» արաբական պորտալը՝ վկայակոչելով զինվորական աղբյուրներ:
Ըստ նրա տեղեկատվության, ԻՊ-ի ահաբեկիչները կառավարական ուժերի դիրքերը գրոհել են Բադիայի շրջանում: Նշվում է, որ նրանք փորձում են ճեղքել շրջափակումը եւ շարժվել դեպի Պալմիրա:
«Ալ Մասդարը» գրում է, որ կատաղի մարտերը շարունակվում են: Պալմիրան անտիկ շրջանի հարստագույն քաղաքներից մեկն է Սիրիական անապատի օազիսում՝ Դամասկոսի եւ Եփրատի միջեւ, որի հնագիտական հուշարձանները 1980 թվականից ներառված են ՅՈւՆԵՍԿՕ-ի Համաշխարհային ժառանգության ցուցակում, հաղորդել է «Ինտերֆաքս»-ը:
