Պայմանագիրը դադարեցվել է
«Բարձրավոլտ էլեկտրական ցանցերի» ՓԲԸ-ն «Տաշիր Գռուպ» ընկերությանը 25 տարով հավատարմագրային կառավարման հանձնելու մասին պայմանագիրը դադարեցվել է և ընկերությունը մնալու է պետական: Այս մասին այսօր ԱԺ-ում լրագրողների հետ զրույցում հայտարարեց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը` պատասխնելով 168.am-ի հարցին, թե արդյոք ճի՞շտ են լուրերը, որ կառավարությունը չեղարկել է ԲԷՑ-ի վերաբերյալ «Տաշիրի» հետ պայմանագիրը:
«Պայմանագրում դրույթներ կային, որ ուղղակի ձեռնտու չէր պետությանը»,- ասաց Ա.Գրիգորյանը` հավելելով, որ որոշումն ընդունվել է պայմանագրի ուսումնասիրության արդյունքում:
Մեր դիտարկմանը, որ տեղեկություններ կան, որ Գագիկ Ծառուկյանն է մտադիր ձեռք բերել ԲԷՑ-երը, նախարարը պատասխանեց. «Բացարձակ սուտ է»:
Հիշեցնենք, որ այս տարվաի ապրիլի 12-ին Կարեն Կարապետյանի կառավարության նիստում որոշում էր կայացվել ԲԷՑ-երը «Տաշիր Գռուպին» հավատարմագրային կառավարման հանձնելու մասին, սակայն պայմանագիրը չստորագրվեց, քանի որ որոշ կետեր դեռևս չէին հստակեցվել։
Ըստ լուրերի` պայմանագիրը չեղարկվել է, որովհետև ԲԷՑ-երի այլ հավակնորդներ են հայտնվել, մասնավորապես՝ նման մտադրություն ունի Գագիկ Ծառուկյանը, ու նաև դրանով էր պայմանավորված էներգետիկայի նախարարի պորտֆելը վերցնելը։
