ԶԼՄ-ներին հայտնի է դարձել ԿԺԴՀ-ի բարձրաստիճան պաշտոնյայի ԱՄՆ այցի մասին
ԿԺԴՀ-ի Աշխատանքային կուսակցության փոխնախագահ Կիմ Յոն Չոլը մայիսի 29-ին ժամանել է Պեկին, որտեղից կուղեւորվի ԱՄՆ՝ մասնակցելու երկու երկրների ղեկավարների հնարավոր գագաթնաժողովի նախապատրաստման բանակցություններին: «Ռյոնհափ» հարավկորեական գործակալության աղբյուրների տվյալներով՝ նա Նյու Յորք թռիչքի տոմս է պատվիրել:
Ավելի վաղ հաղորդվել է, որ Կիմ Յոն Չոլը ԱՄՆ կուղեւորվի ի պատասխան ԱՄՆ-ի պետքարտուղար Մայք Փոմպեոյի՝ վերջերս կատարած այցերի: Ինչպես սպասվում է, պաշտոնյաները վերջնականապես կպայմանավորվեն ԱՄՆ-ի նախագահ Դոնալդ Թրամփի եւ Հյուսիսային Կորեայի առաջնորդ Կիմ Չեն Ընի հանդիպման շուրջ: Պետությունների ղեկավարների գագաթնաժողովը, ինչպես սպասվում է, կկայանա հունիսի 12-ին Սինգապորում, հաղորդել է «Ինտերֆաքս»-ը:
