«Վերջին 3-4 տարում կենսաթոշակ ավելացնելու հնարավորություն եղե՞լ է, թե՞ ոչ». Միքայել Մելքումյանը՝ փոխնախարարին
Այսօր Ազգային ժողովում քննարկվում է «Պետական կենսաթոշակների մասին Հայաստանի Հանրապետության օրենքում փոփոխություն կատարելու մասին» օրենքի նախագիծը:
ՀՀ աշխատանքի և սոցիալական հարցերի նախարարի տեղակալ Սմբատ Սաիյանն ասաց, որ գործող կարգավորումով մարդիկ ներկայացնում են տեղեկանք իրենց աշխատանքի վերաբերյալ, որից հետո կենսաթոշակը վերահաշվարկվում է: Հիմա առաջարկում են հանել այդ դրույթը, որպեսզի միայն դիմումը բավարար լինի կենսաթոշակառուի թոշակը հաշվարկելու համար:
«Անկեղծ ասեք՝ վերջին 3-4 տարում կենսաթոշակ ավելացնելու հնարավորություն եղե՞լ է, թե՞ ոչ»,- հարցով հիմնական զեկուցողին դիմեց «Ծառուկյան» խմբակցության պատգամավոր, ԱԺ փոխխոսնակ Միքայել Մելքումյանը:
Ի պատասխան՝ Ս. Սաիյանն ասաց. «Հեռու եմ այն մտքից, որ որևէ պահի առկա է եղել հնարավորություն՝ բարձրացնելու թեկուզ 2-3 հազար կենսաթոշակները, ու չի արվել: 2-3 հազար բարձրացնելու համար անհրաժեշտ է 12-15 միլիարդ դրամ: Այնպես չէ, որ փոքր գումարների մասին է խոսքը»:
ԱԺ փոխնախագահ Էդուարդ Շարմազանովն էլ նկատեց, որ նախկին իշխանությունը նորին թողել է 7.5 տոկոս տնտեսական աճով տնտեսություն, ու հիմա իրենք կարող են որոշել՝ բարձրացնե՞լ, թե՞ ոչ:
