Բացահայտվել է խոշոր չափերով գումար հափշտակելու դեպք. մեղադրվում է նաև տուժողի որդին
ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննվող քրեական գործով ձեռնարկված անհրաժեշտ քննչական և դատավարական այլ գործողությունների արդյունքում բացահայտվել է խարդախությամբ առանձնապես խոշոր չափերով գումար հափշտակելու դեպք. մեղադրանք է առաջադրվել 3 անձի, այդ թվում՝ տուժողի որդուն:
2017թ. հոկտեմբերի 24-ին Երևան քաղաքի բնակչից հաղորդում է ստացվել առ այն, որ 2017թ. ապրիլ-հոկտեմբեր ամիսներին իր ծանոթ եղբայրները՝ ծնված 1998 և 1999թթ., տարբեր պատրվակներով, խաբեությամբ և վստահությունը չարաշահելու եղանակով իրենից հափշտակել են առանձնապես խոշոր չափերի գումար:
Դեպքի առթիվ հարուցվել է քրեական գործ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, որով նախաքննությունն իրականացվում է ՀՀ ՔԿ ԵՔՔՎ Էրեբունի և Նուբարաշեն վարչական շրջանների քննչական բաժնում:
Քրեական գործով ձեռնարկված անհրաժեշտ քննչական և դատավարական այլ միջոցառումների արդյունքում պարզվել են դեպքի էական նշանակություն ունեցող մի շարք հանգամանքներ, Երևանի բնակչից խաբեությամբ գումարներ հափշտակելու մեխանիզմը, ենթադրյալ հանցագործություն կատարած անձանց շրջանակը:
Նախնական քննությամբ փաստական տվյալներ են ձեռք բերվել, որ տուժողից գումարներ հափշտակվել են իր իսկ անչափահաս որդու մասնակցությամբ: Մասնավորապես՝ երիտասարդ եղբայրները տուժողի անչափահաս որդու՝ 2001թ. ծնված պատանու հետ պայմանավորվածություն են ձեռք բերել նրա հորից խաբեությամբ գումար հափշտակելու շուրջ: Պարզվել է, որ երիտասարդները և անչափահասը, հաճախելով գիշերային ակումբներ, զվարճանքի կենտրոններ, կուտակել են պարտքեր և գոյացած պարտքերը մարելու և նույն ապրելակերպը շարունակելու նպատակով հորինել են տարբեր պատմություններ՝ անչափահասի հետ կապված, և օգտվելով ծնողի կողմից որդու նկատմամբ ցուցաբերած հոգատարությունից՝ նրանից տարբեր դեպքերով հափշտակել առանձնապես խոշոր չափերի գումար:
Մինչդատական վարույթում ձեռք բերված բավարար ապացույցների հիման վրա՝ երիտասարդ եղբայրներին և անչափահասին մեղադրանք է առաջադրվել՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով։ Եղբայրների նկատմամբ որպես խափանման միջոց է ընտրվել կալանավորումը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
