«Կամակորությունն այս դեպքում սխալ է». Վովա Վարդանովը՝ Նիկոլ Փաշինյանի «լայվերի» մասին

«Ողջ մնալու արվեստ» հասարակական կազմակերպության նախագահ, առաջին հետախուզադիվերսիոն խմբի հիմնադիր Վովա Վարդանովը ողբերգություն չի համարում այն, որ քննությունների հետաձգման պատճառով զինվորական զորակոչն էլ, հնարավոր է, մեկ շաբաթով հետաձգվի:

Այսօր լրագրողների հետ հանդիպման ժամանակ նա նկատեց, որ Չեռնոբիլի ողբերգությունը տեղի ունեցավ, և բոլոր զինվորական շրջանները, որոնք Չեռնոբիլին մոտ էին, զորացրվեցին 1-2 ամիս ուշ. «Դրա մեջ լուրջ խնդիր ես չեմ տեսնում: Եթե անհրաժեշտ է երկրի համար, մի շաբաթ էլ, երկու շաբաթ էլ, մի ամիս էլ, մի տարի էլ, զինվորը պետք է ուշ զորացրվի»:

Անդրադառնալով ՀՀ կրթության և գիտության նախարար Արայիկ Հարությունյանի՝ ռազմահայրենասիրական դաստիարակության նախագիծը հետ կանչելու վերաբերյալ արած հայտարարության մասին՝ Վ. Վարդանովն ասաց. «Իմ տղան առաջին դասարան էր, ինքն անգիր գիտեր ամբողջ դասագիրքը: Մի անգամ թերթում եմ գիրքը, մի հայրենասիրական ոտանավոր կար, ասում եմ՝ սա ասա, ասում է՝ ընկեր Սարգսյանը սա չի տվել:

Միշտ ինչ-որ կեղծ խաղաղասեր ուսուցիչներ են լինում, որոնք վնաս են հասցնում ռազմահայրենասիրական դաստիարակությանը: Հիմա նման կեղծ հայրենասեր, ինչ-որ հումանիզմով վարակված, չգիտեմ՝ ում են կարդացել, կարճ ասած՝ էդ մարդիկ շատ են սխալվում, որովհետև այդ երեխան ոչ միայն այս երկիրը պետք է սիրի, այլև՝ ռազմական անհրաժեշտության դեպքում զենքը ձեռքը կարողանա ոտքի կանգնի և պաշտպանի իր երկիրը: Ես դա ոչ թե չեմ ողջունում, այլև՝ համարում եմ մեր ապագայի նկատմամբ հանցավոր»:

Վ. Վարդանովը խոսեց նաև ՀՀ վարչապետ Նիկոլ Փաշինյանի ուղիղ հեռարձակումների մասին. «Այդ «լայվերը» ես գիտեմ՝ որտեղից են գալիս, կարծեմ Ամերիկայի առաջին սևամորթ նախագահն էր լայվ անում: Մեր այսօրվա վարչապետը նման ուղիով գնում է, որպեսզի ցույց տա իր կապը ժողովրդի հետ: Դա իր աշխատելու ձևն է, բայց հարցեր է առաջանում՝ իսկ ինչո՞ւ Բաղրամյան 26-ում ոչ մի տեխնիկական միջոց չկար, որ լարով չէր աշխատում: Պարզ է, չէ՞, որ այդ ամեն ինչն արվում է նրա համար, որ прослушка չլինի, որ միացումներ չլինեն: Այս սմարթֆոնն այնպիսի հնարավորություն ունի, որ հատուկ ծառայությունները, նստած լինելով Վաշինգտոնում կամ Անկարայում, միացումներ տան, ու դու նույնիսկ տեղյակ չլինես:

Դա անվտանգության կանոններն ինչ-որ տեղ խախտող բան է: Կամակորությունն այս դեպքում սխալ է, պետք չէ մոռանալ, որ շատ ավելի լուրջ առաջին դեմքեր շատ ավելի լուրջ երկրներից, շատ ավելի դեմոկրատ երկրներից անվտանգության կանոններին ենթարկվում են, ինչի՞ պետք է չենթարկվի օրինականության մասին խոսող մեր վարչապետը»:

Մանրամասները՝ 168.am-ի տեսանյութում: