«Մենք մի փոքր ինքնախաբեության մեջ ենք». Արա Պապյանը՝ Արցախը բանացկային սեղան վերադառնալու մասին
«Ակնհայտ է, որ Արցախը չի կարող վերադառնալ բանակցային սեղան. դրան չեն համաձայնի ո՛չ Բաքուն, ո՛չ էլ միջնորդները, որովհետև երբ մենք ասում ենք՝ վերադառնալ, մենք մի փոքր ինքնախաբեության մեջ ենք»,- այսօր «Մեդիա կենտրոնում» կազմակերպված քննարկման ժամանակ այս մասին ասաց ՀՀ արտակարգ ու լիազոր դեսպան, «Մոդուս վիվենդի» կենտրոնի ղեկավար Արա Պապյանը։
Նա նշեց, որ Արցախը երբևէ բանակցությունների սեղանի շուրջ չի եղել, անգամ, որպես ինքնահռչակ պետություն. «Այն ժամանակ, երբ մասնակցում էր, նրա կարգավիճակը Արցախի հայ համայնքի ներկայացուցիչների կարգավիճակն էր, որին զուգահեռ մասնակցում էր Արցախի ադրբեջանական համայնքը։ Այսօր որևէ մեկը չի գնա դրան»։
Թեև Նիկոլ Փաշինյանն ասաց, որ ամեն ջանք պետք է գործադրել, որ Արցախի անկախությունը ճանաչեն, բայց ըստ Պապյանի՝ դա էլ տեղի չի ունենա. «Դա հնարավոր չէ․Արցախի անկախությունը ճանաչելու համար Արցախը պետք է լինի անկախ։ Արցախն անկախ չէ, դրա մասին բոլորը գիտեն։ Արցախը ՀՀ-ի կատարյալ վերահսկողության տակ է, որովհետև անկախություն նշանակում է՝ ոչ միայն անկախություն Ադրբեջանից, այլև Հայաստանից։ Ակնհայտ է, որ դա այդպես չէ։ Արցախը դե յուրե և դե ֆակտո ՀՀ-ի մաս է։ Կարելի է ցանկացած բան հայտարարել, շարունակել բանակցությունները՝ ինչ-որ ձև այս ընթացքը պահելու համար, բայց խնդիրը չունի բանակցային լուծում։ Այն կարող է լուծվել Հայաստանի հզորացման և Ադրբեջանի թուլացման, տրոհման ճանապարհով։ Այլ ճանապարհ չկա»։
