Արագածոտնի մարզում իրականացվել է hակակարկտային հրթիռների առաջին փորձարկումը
ՀՀ արտակարգ իրավիճակների, պաշտպանության և գյուղատնտեսության նախարարությունների ներկայացուցիչների մասնակցությամբ փորձարկվեց Արտաշավան համայնքում տեղակայված ՀՀ կառավարության կողմից իրականացվող պիլոտային ծրագրով ձեռքբերված հրթիռները և «Элия 3» հրթիռային կայանը, որը հակակարկտային կրակոցներն իրականացնում է ռադիոլոկացիոն կայանի տրամադրած տվյալների հիման վրա՝ ապահովելով թիրախավորման մեծ ճշգրտություն:
Նոր հրթիռային կայանի և հրթիռների առաջին փորձարկումը հաջող էր, սակայն երկրորդի ժամանակ արձանագրվեցին որոշ թերություններ: ՀՀ ԱԻ նախարար Դավիթ Տոնոյանի կողմից որոշում կայացվեց հետագա փորձարկումները դադարեցնել մինչ մայիսի վերջ՝ մինչև Ռուսաստանից Հայաստան կժամանեն արտադրող «ԱՆՏԻԳՐԱԴ» ընկերության, Պոլիմերային նյութերի գիտահետազոտական ինստիտուտի և «Իրվիս» ընկերության ներկայաուցիչները: Ռուս փորձագետները տեղում կուսումնասիրեն ու կշտկեն փորձարկման ընթացքում արձանագրված տեխնիկական խնդիրները, որից հետո կայանի փորձարկումները կվերսկսվեն:
Նշենք, որ Հայաստանում հակակարկտային պաշտպանության առավել արդյունավետ մեթոդների ներդրման նպատակով 2017թ. ՀՀ ԱԻ նախարարության պատվերով ՌԴ «ԱՆՏԻԳՐԱԴ» գիտաարտադրական ընկերությունը ուսումնասիրություն էր կատարել Հայաստանի տարածքում, նախանշել կարկտաբեր առավել վտանգավոր տարածքները և կազմել հրթիռային կայանների տեղադրման քարտեզը: ՀՀ կառավարության որոշմամբ իրականացվում է հակակարկտային հրթիռային պաշտպանության պիլոտային ծրագիր, որի շրջանակներում արդիականացվել է Արագածոտնի ռադիոլոկացիոն կայանը, իրականացվել է անձնակազմի ուսուցում, ձեռք է բերվել հրթիռային 3 կայան և 120 հրթիռ:
Պիլոտային ծրագրի ավարտից հետո կիրականացվի արդյունքների գնահատում, որի հիման վրա որոշում կկայացվի ծրագրի ընդլայնման վերաբերյալ:
