Մտահոգիչ իրավիճակ. Այսօրվա դրությամբ Հայաստանի ջրամբարների լցվածությունը 39 % է
Այսօրվա դրությամբ Հայաստանի ջրամբարների լցվածությունը 39 % է` անցած տարվա 58%-ի փոխարեն: Այս մասին այսօր կառավարության նիստից հետո լրագրողների հետ զրույցում հայտարարեց Ջրային տնտեսության պետական կոմիտեի նախագահ Արսեն Հարությունյանը:
«Ոռոգման սեզոնի սկզբին պետք է ամբողջությամբ պատրաստ լինենք ոռոգման ջրամատակարարում ապահովելու»,- ասաց Ա. Հարությունյանը:
Ըստ նրա` բավարար քանակով ոռոգման ջուր ապահովելու նպատակով վերականգնվելու են խորքային հորերը, փորվելու են նորերը, տեղադրվելու են պոմպեր:
«Մտահոգություն ունենք, դրա համար միջոցառումներ ենք իրականացնում, որպեսզի ոռոգման սեզոնին մտահոգությունները հնարավորինս նվազագույնի հասցնենք»,- ասաց կոմիտեի նախագահը:
