Բարսելոնայում բացվել է Հարավային Օսիայի ԱԳՆ-ի ներկայացուցչությունը
Կատալոնիայի գլխավոր քաղաքում՝ Բարսելոնայում, բացվել է Հարավային Օսիայի արտաքին գործերի նախարարության ներկայացուցչությունը: Այդ մասին հայտնել է «Sputnik Հարավային Օսիա»-ն՝ վկայակոչելով գերատեսչության մամուլի ծառայությունը:
ԱԳՆ-ում պարզաբանել են, որ ներկայացուցչության բացումը կնպաստի երկկողմ կապերի հաստատմանը, առաջին հերթին՝ մշակույթի բնագավառում եւ հումանիտար ոլորտում: Իր հերթին կարճաժամկետ աշխատանքային այցով Կատալոնիա է ժամանել Հարավային Օսիայի արտաքին գործերի նախարար Դմիտրի Մեդոեւը:
Նախարարը նշել է, որ Կատալոնիայի իրադարձությունները, որոնց վրա է բեւեռված ամբողջ աշխարհի ուշադրությունը, հատուկ հետաքրքրություն են առաջացնում Հարավային Օսիայում: «Քսանվեց տարի առաջ Հարավային Օսիայի ժողովուրդն ինքն է նույն այդ բախտորոշ քաղաքական քայլերն իրականացրել սեփական պետականության կայացման ճանապարհին»,-ասել է Մեդոեւը:
